गुल्मी । ‘जुम्लाका कृषकहरुले दुःख गरी उब्जाएका स्याउले राम्रेसँग बजार पाएका छैनन् ।’ जुम्ला क्षेत्र नम्बर १ बाट निर्वाचित सासंद आशा घर्तीले संसदमा भनिन्, ‘यसपाली त स्याउले राम्रै बजार पाउलान र राम्रोसँग घर–परिवार चलाउला भन्ने कृषकको आशा निराशामा परिणत भएको छ ।’

गुल्मी क्षेत्र नम्बर २ बाट निर्वाचित सासंद प्रमिला विश्वकर्माले अस्पतालमा डाक्टर र औषधी नभएको तथा स्वास्थ्य बीमाको प्रभावकारीताका सम्बन्धमा बिषय उठान गरिन् । जिल्लामा ठुला–ठुला रोगको उपचार हुन नसकेको, अस्पतालमा डाक्टर भए बिरामी नभएको र बिरामी भए औषधी नभएको उनको भनाई थियो । त्यसैगरी सरकारले स्वास्थ्य बीमाको व्यवस्था गरेपनि बिरामीले आफ्नै पैसाबाट उपचार गराइरनुपर्ने बाध्यता रहेको भन्दै सासंद विश्वकर्माले सरकारको ध्यानाकर्षण गराइन् ।

प्युठानबाट निर्वाचित सासंद लक्ष्मी थापाले अझै पनि दलितहरु नागरिकको दर्जामा नरहेको भन्दै संसदमा आवाज उठाइन् । ‘प्युठानका अधिकाशं ठाउँहरुमा छूवाछूत अन्त्य हुन सकेको छैन, जातीगत विभेदले गर्दा दलितहरु पिछडिएका छन् ।’ उनले भनिन्, ‘आखिर दलितहरुले यो विभेद कहिलेसम्म भोगिरहने ?’

गुल्मीबाट निर्वाचित सासंद सिर्जना पाण्डेले गुल्मीको पश्चिम क्षेत्रमा पुल नहुँदा समस्या भएको बिषय उठान गरिन् । ‘विकासको नाममा गरिब, दुखीको बारी मासेर सडक खनियो तर त्यसबीचमा पर्ने खोलामा पुल बनाइएन ।’ बुधबारको सिद्धबाबा संसदमा बोल्दै सासंद पाण्डेले भनिन्, ‘यस्तो समस्या कहिलेसम्म भोगिरहने ?’

सासंदमा बोल्नें माननीयले जातीय छूवाछूत, विकास निर्माण, शिक्षा, स्वास्थ्य, खेलकुद, रोजगारी लगायतका देशका सबै पक्षको बिषय उठान गरेका थिए ।

त्यसपछि समाभुखले शून्य समय सकिएको र विशेष समय सुरु भएको घोषणा गरे । विशेष समयमा बेल्ने माननीयलाई दुई÷दुई मिनेट समय दिइयो । सुरुमा बोल्दै सासंद कुमारी बलालले देश विकासको लागि सरकार मात्रै नभएर सबै पक्ष एकैठाउँ हुनुपर्ने बताइन् । विशेष समयमा १० जना माननीयले बोले । त्यसपछि शिक्षामन्त्रीको भूमिकामा रहेका विपिन पन्थीले ‘शिक्षा विधेयक–२०८०’ को प्रस्ताव पेश गरे । लगत्तै प्रतिपक्ष दलका नेता विपिन सुनारले त्यस प्रस्तावको विरोध गरे ।

त्यसपछि केहीबेर सत्तापक्ष र प्रतिपक्षका सासंदहरुबीच वादविवाद भयो । त्यसपछि गृह, महिला तथा बालबालिका र भौतिक पूर्वाधार विकास मन्त्री रोष्टममा गई बोले । प्रधानमन्त्रीको भूमिकामा रहेकी ममत बुढाथोकीले उठेका सबै प्रश्न समेटिने गरिन धारणा राखिन् । अन्त्यमा शिक्षा विधेयक पास गर्ने बिषयमा सत्तापक्ष र प्रतिपक्षबीच मतदात भयो ।

प्रस्तावको ‘हुन्छ’ भन्ने पक्षमा बहुमत देखिएकोले सभामुखले पारित भएको घोषणा गरे । त्यसको केहीबेरमै राष्ट्रपति कार्यालयबाट आएको संसद अधिवेशन अन्त्य भएकोसम्बन्धि पत्र पढेर सुनाउदैँ सभामुख र उप–सभामुख संसद भवन बाहिर गए ।

समाचारमा उल्लेखित पात्र वास्तविक सासंद नभएर नमुना युवा सासंदका सहभागि हुन् । गुल्मीको रेसुङ्गा नगरपालिका–०८ स्थित सिद्धबाबा माध्यमिक विद्यालयमा पुग्ने जो कोहीलाई देशको संघीय संसद भवनमा पुगेझै भान हुन्थ्यो । विद्यालयले संचालन गरेको ‘नमुना युवा सासंद’ अभ्यासमा देशकै संघीय संसदमा संचालन भइरहेको सभाको झल्को दिनेगरी विद्यार्थीहरुले आफ्नो प्रस्तुती गरिरहेका थिए ।

जसमा सबैभन्दा अगाडी सभामुख, उपभामुख र सचिवको व्यवस्था गरिएको थियो । त्यसैगरी विद्यार्थीहरुलाई सत्तापक्ष, प्रतिपक्षमा, दलका नेता, प्रमुख सचेतक, मन्त्री, प्रधानमन्त्री लगायतमा विभाजन गरिएको थियो । सत्तापक्ष र प्रतिपक्षलाई अलग–अलग साइडमा राखिएको थियो । बाँकी विद्यार्थीहरु सासंदको भूमिकामा सदनमा प्रस्तुत भएका थिए ।

सिद्धबाबा माविले विद्यार्थीहरुको सर्वाङ्गिण विकासको लागि ‘नमुना युवा सासंद’को कार्यक्रम संचालन गरेको प्रधानाध्यापक डोर विक्रम श्रीसले बताए । विद्यालयले कानुन बिषयमा अध्ययन गर्ने ९० जना विद्यार्थीहरुलाई नमुना युवा सासंद कार्यक्रममा सहभागि गराएको थियो ।

(१५ पटक भ्रमण गरिएको, आज १५ पटक भ्रमण गरिएको)