तेक्वान्दोका अन्तर्राष्ट्रिय रेफ्री अशोक खड्का पुम्से विधातर्फ दोस्रो श्रेणीको रेफ्रीमा पदोन्नति भएका छन्।
वल्र्ड तेक्वान्दो (डब्लुटी) को रेफ्री कमिटीले अशोकलाई बिहीबार दोस्रो श्रेणीको प्रमाणपत्र प्रदान गरेको छ। तेस्रो श्रेणीबाट दोस्रोमा पदोन्नति हुन करिब पाँच वर्ष लागेको अशोकले जानकारी गराए।
तेक्वान्दोको र्याङकिङ प्रतियोगिता र रिफ्रेसर कोर्समा सहभागिता जनाई प्राप्त गरेको अंकका आधारमा अशोक एक तह माथि उक्लन सफल भएका हुन्। तेस्रोबाट दोस्रो श्रेणीमा उक्लन कम्तीमा आठ अंक आवश्यक पर्दछ। करिब पाँच वर्षको अवधिमा उनले दश पुम्से प्रतियोगिता र एक रिफ्रेसर कोर्समा सहभागिता जनाएको जानकारी गराए।
यसअघि अशोकले सन् २०२१ मा ग्यारोगी विधामा पनि दोस्रो श्रेणीको रेफ्रीको मान्यता पाएका थिए।
अशोकका अनुसार उनले सन् २०२३ मा दक्षिण कोरियामा वल्र्ड तेक्वान्दो पुम्से च्याम्पियनसिप, किमुनयोङ कप, अस्ट्रेलियामा भएको अस्ट्रेलियन ओपन, प्रेसिडेन्ट कप, ओसियना ओपन पुम्से च्याम्पियनसिप, बुल्गेरिया ओपन, सन् २०२२ मा चुनचुन कोरिया ओपन, सन् २०२० मा मेक्सिको ओपन, सन् २०१९ मा १३ औं दक्षिण एसियाली खेलकुद तथा डब्ल्युटी प्रेसिडेन्ट कप अस्ट्रेलिया र दक्षिण कोरियामा ४५ औं अन्तर्राष्ट्रिय पुम्से रिफ्रेसर कोर्स २०२२ मा सहभागिता जनाएका थिए।
दुई वर्षअघि युवा तथा खेलकुद मन्त्रालयले अशोकलाई राष्ट्रिय खेलकुद प्रतिभा सम्मान अन्तर्गत उत्कृष्ट निर्णायकबाट सम्मान गरेको थियो। अशोक ग्योरोगी, पुम्से र पारा तेक्वान्दो गरी तीनै विधाका अन्तर्राष्ट्रिय निर्णायक हुन्।
प्रकाशित: ४ माघ २०८० १९:४६ बिहीबार