काठमाडौं । दि मुग्लान रेस्टुरेन्टले अस्ट्रेलिया र पोखरापछि पर्यटकीय नगरी भक्तपुरको मुख्य क्षेत्र दरबार स्क्वायरनजिकै पनि आफ्नो शाखा विस्तार गरेको छ ।

अस्ट्रेलियामा १४ वर्षदेखि रेस्टुरेन्ट सञ्चालन गरिरहेको नेपाली व्यवसायीको समूहले ६ वर्षअघि पोखरामा शाखा विस्तार गरेकामा अन्तर्राष्ट्रियस्तरको सेवा सुविधासहित भक्तपुरमा पनि अर्काे शाखा सञ्चालनमा ल्याएको हो । जसको भोलि १८ देखि २० माघसम्म ‘ग्रान्ड ओपनिङ’ कार्यक्रम पनि तय भएको छ । तीनदिने ग्रान्ड ओपनिङ कार्यक्रम भव्य गर्ने तयारी पनि दि मुग्लान होटल एन्ड रेस्टुरेन्ट भक्तपुर शाखाले गरिरहेको छ ।

भक्तपुर शाखा दि मुग्लान रेस्टुरेन्टको छैठौं शाखा हो । यसका अस्ट्रेलियामा चारवटा र पोखरामा एउटा शाखा रहेको छ ।

भक्तपुरमा शाखा विस्तार गर्ने क्रममा व्यवस्थापन पक्षले आवश्यक सर्भेसमेत गरेको थियो । दरबार स्क्वायर क्षेत्र र आसपास थकाली रेस्टुरेन्ट नभएको, स्वादिष्ट खानाको अभाव खट्किएको र लाइभ म्युजिक अवधारणामा रेस्टुरेन्ट सञ्चालन नभएको पाइएपछि त्यसलाई पूर्ति गर्ने उद्देश्यले दि मुग्लान रेस्टुरेन्ट भक्तपुर शाखा सञ्चालनमा ल्याइएको हो ।

– हाइजेनिक र स्वादिष्ट खाना अनि शान्त तथा पूर्ण पारिवारिक वातावरण रेस्टुरेन्टको विशेषता

– हरेक साँझ लाइभ म्युजिक पनि

भक्तपुर शाखाका प्रबन्ध निर्देशक विजय लामाका अनुसार, २ सय जनाभन्दा बढी ग्राहकलाई एकैपटक सेवा प्रदान गर्न सक्नेगरी दि मुग्लान होटल एन्ड रेस्टुरेन्ट सञ्चालनमा ल्याइएको हो । रेस्टुरेन्टमा बियर गार्डेन, रूफटप बारका अलावा करिब ८० जना र ३० जना क्षमताका छुट्टाछुट्टै सभाहलको पनि सुविधा छ । यस्तै, आवासका लागि १२ वटा डिलक्स रुमको समेत सुविधा रहेको छ ।

त्यसो त दि मुग्लान रेस्टुरेन्टले काठमाडौंमा पनि शाखा विस्तार गर्ने सोचाइ लामो समयदेखि बनाइरहेको थियो । तर, सर्भेका क्रममा भक्तपुरको दरबार क्षेत्र उपयुक्त देखिएपछि काठमाडौंअघि भक्तपुरमा शाखा विस्तार गरिएको हो । निकट भविष्यमै काठमाडौंलगायत विभिन्न सहरमा शाखा विस्तार गर्ने तयारी पनि दि मुग्लान रेस्टुरेन्टले गरिरहेको छ ।

रेस्टुरेन्ट व्यवस्थापन पक्षले खानाका पारखीहरूलाई अस्ट्रेलिया र पोखराकै गुणस्तरमा सेवा उपलब्ध गराउने पनि जनाएको छ । यद्यपि, पोखराको तुलनामा भक्तपुरको मेनु भने कम रहेको दाबी पनि व्यवस्थापन पक्षको रहेको छ । सस्तो मूल्यमा उत्कृष्ट हाइजेनिक अनि स्वादिष्ट थकाली खाना तथा खाजाका विभिन्न परिकार खुवाउने पनि प्रबन्ध निर्देशक लामाले बताए । विदेशी र स्वदेशी दुवैलाई ध्यान दिएर मेनु रकम निर्धारण गरिएको पनि प्रबन्ध निर्देशक लामाको भनाइ छ ।

दि मुग्लान होटल एन्ड रेस्टुरेन्ट भक्तपुर शाखाको मुख्य विशेषता भनेको हाइजेनिक र गुणस्तरीय खानाका अलावा शान्त वातावरण पनि हो । पर्यटकीय नगरी भक्तपुरको मुख्य क्षेत्र दरबार स्क्यायर गेट परिसरमै रहेको यो रेस्टुरेन्टभित्र जाने बित्तिकै ग्राहकले आफूलाई पारिवारिक वातावरणमा शान्ति र आनन्दित महसुस गर्नेछन् । जिल्ला प्रशासन कार्यालय र प्रहरी परिसरअगाडि नै यो रेस्टुरेन्ट रहेको छ ।

यहाँ होटल एन्ड रेस्टुरेन्ट सञ्चालनका लागि हालसम्म २ करोड रुपैयाँ खर्च भइसकेको छ । अझै लगानी बढ्ने सञ्चालकहरूको भनाइ छ ।
भक्तपुर शाखाले आफ्ना ग्राहकको मन जित्न हरेक साँझ ‘लाइभ म्युजिक’ गर्ने योजना पनि राखेको छ । यसका लागि जिल्ला प्रशासन कार्यालय र नगरपालिकाबाट अनुमतिसमेत लिइसकेको छ । हाललाई राति ९ बजेसम्मको अनुमति पाएको सो रेस्टुरेन्टका सुमन गुरुङले बताए ।

रात्रिकालीन व्यवसाय सञ्चालन गर्ने हाम्रो उद्देश्य रहेको छ, हाललाई लाइभ म्युजिकका लागि जिल्ला प्रशासन र नगरपालिकाबाट राति ९ बजेसम्मको समय पाएका छौं, बिस्तारै थप समय पाउने विश्वास हामीले लिएका छौं,’ उनले भने । उनले सांगीतिक मनोरञ्जनका लागि ‘लोकल हाउस ब्यान्ड’लाई प्राथमिकता दिने पनि बताए ।

तीनदिने ग्रान्ड ओपनिङ कार्यक्रम तय गरेको दि मुग्लान होटल एन्ड रेस्टुरेन्ट भक्तपुर शाखाले १८ माघ (पहिलो दिन) लाखेनाच, मारुनी, तामाङ सेलो, कुमारी नाच र धिमीलाई पनि समेट्ने भएको छ । सोही दिन नेपाल आइडल सिजन २ की ‘गोल्डेन माइक होल्डर’ एवं चर्चित गायिका निलिमा थापा मगर र ब्यान्ड च्याम्पियन नेपालको उत्कृष्ट ८ मा पर्न सफल चर्चित ब्यान्ड एनएस ११३४ लाई उतार्ने भएको छ ।

यस्तै, दोस्रो दिन अर्थात् १९ माघका दिन सुगम संगीतका चर्चित गायक सुगम पोखरेलसहितको बाजागाजा ब्यान्डको लाइभ प्रस्तुति रहनेछ भने २० गते चर्चित एवं भर्सटाइल गायिका मिलन नेवार, मोलोडियस ब्यान्डको विशेष सांगीतिक प्रस्तुति रहनेछ ।

तीन दिने ग्रान्ड ओपनिङ कार्यक्रममा रेस्टुरेन्टको क्युआरमार्फत् रेजिस्ट्रेसन गर्दा बिलमा १० प्रतिशत छुट पाउने पनि सो रेस्टुरेन्टले जनाएको छ ।

(29 पटक भ्रमण गरिएको, आज 29 पटक भ्रमण गरिएको)