बालिका बलात्कारको आरोपमामा भक्तपुरबाट प्रहरीले एक जनालाई नियन्त्रणमा लिएको छ।
सिन्धुली कमलामाई नगरपालिका वडा नं-११ घर भई हाल जिल्ला भक्तपुर चाँगुनारायण नगरपालिका वडा नं- २ दुवाकोटस्थित एक इट्टा भट्टामा काम गर्ने ४९ वर्षीय सोमबहादुर स्याङतानलाई प्रहरीले नियन्त्रणमा लिएको हो।
उनलाई चाँगुनारायण नगरपालिका वडा नं- ५ पिखेलबाट पक्राउ गरिएको भक्तपुर प्रहरी परिसरले जनाएको छ।
बालिका हराएको भनी पीडित बालिकाको आफन्तले प्रहरी परिसर भक्तपुरमा निवेदन दिएका थिए। सोही निवेदनको आधारमा खोजतलास गर्ने क्रममा पीडितकै आफन्तले पिखेलमा बालिकालाई फेला पारेको भक्तपुर प्रहरी परिसरले जनाएको छ।
जिल्ला प्रहरी परिसर भक्तपुर र प्रहरी प्रभाग व्यासी भक्तपुरबाट खटिएको प्रहरी टोलीले पीडित बालिकालाई तत्काल उद्धार गरि प्रहरी परिसर भक्तपुरमा राखिएको परिसरका सूचना अधिकारी किशोर ढुंगानाले जनाए।
घटनाका आरोपित स्याङतानले निज बालिकालाई आफ्नो झ्याउली (छाप्रो) मा लगी जबरजस्ती करणी गरेको भन्ने खुल्न आएको प्रहरीले जनाएको छ।
प्रतिवादी स्याङतानलाई पिखेलबाट नियन्त्रणमा लिई मंगलबार जिल्ला अदालत भक्तपुरमा जबरजस्ती करणी मुद्दामा पेश गरी पाँच दिन म्याद थप भई थप अनुसन्धान कार्य भइरहेको प्रहरीले जनाएको छ।
प्रकाशित: ४ पुस २०८० २०:२१ बुधबार