काठमाडौं। नेपाल चेम्बर अफ कमर्सको पदाधिकारी टोली चीन भ्रमणमा गएको छ । प्रधानमन्त्री पुष्पकमल दाहालको चीन भ्रमणका क्रममा निजीक्षेत्रको तर्फबाट चेम्बर पनि सहभागी भएको हो । भ्रमण टोलीमा अध्यक्ष राजेन्द्र मल्ल, निवर्तमान अध्यक्ष राजेशकाजी श्रेष्ठ, उपाध्यक्षहरू दीपक मल्होत्रा, उर्मिला श्रेष्ठ र त्रिभुवनधर तुलाधर सहभागी छन् ।
भ्रमणका क्रममा चिनियाँ निजीक्षेत्रसँग दुईपक्षीय आर्थिक एवं व्यापारिक सम्बन्धबारे छलफल हुने अध्यक्ष मल्लले बताए । उनका अनुसार प्रधानमन्त्रीको भ्रमणका क्रममा दुई देशबीचका निजी क्षेत्रबीच दुईपक्षीय व्यापार सहजीकरण, पूर्वाधारमा लगानी लगायतका विषयमा छलफल हुुँदै छ । नेपाल चीनबीचको व्यापार सम्झौतालाई समय सापेक्षा पुनरवलोकन गरेर व्यापार सहजीकरण गर्ने विषय चेम्बरको प्राथमिकतामा रहेको उनको भनाइ छ ।
नेपाल चीनबीच यसअघि भएको पारवहन सम्झौताको प्रभावकारी कार्यान्वयन एवं उत्तरी छिमेकीसँगको सीमामा सुविधा सम्पन्न सडक पूर्वाधार निर्माण गर्नुपर्ने विषयमा चीनका निजीक्षेत्रसँग छलफल गर्ने चेम्बरले जानकारी दिएको छ । ‘चीनसँगको सीमामा सुविधासम्पन्न सडक पूर्वाधार निर्माण गरेर तातोपानी, केरुङ जस्ता भन्सार नाकामा स्तरोन्नति गरिनुपर्ने विषय पनि उठान गर्नेछौं,’ मल्लले भने । भन्सार नाकामा अन्तरराष्ट्रियस्तरको क्वारेन्टिन ल्याब राखेर नेपालको निर्यात प्रवर्द्धन गरिनुपर्नेमा उनले जोड दिए ।