पोखरा । ‘जण्ड, उदण्ड जे भने पनि प्रचण्ड घाम त अस्त हुन्छ
हिउँदको यो भारी हिमपात पनि पग्लेर पानीपानी हुन्छ
प्रेममा जो मरे उसको नाममा ताजमहल बन्छ ।’

काठमाडौंका विश्वबिमोहन श्रेष्ठ यसरी ४५ वर्षपछि मुक्तक सुनाउँदै विगतमा फर्किएँ । २० माघ, २०३५ मा पोखरामा भएको टिकटमा मुक्तक कार्यक्रमका उनैले प्रमुख अतिथि हरिभक्त कटुवाललाई साथै लिएर पोखरा आएका थिए ।
सिर्जनाको पनि मूल्य हुन्छ भनी पञ्चायतकालीन बेलामा पनि पोखरेली युवा सांस्कृतिक परिवारले आयोजना गरेको उक्त दिनको स्मरणमा शनिबार यस्तै कार्यक्रम दोहो-यायो । श्रेष्ठले सम्झे, ‘यसैगरी हल खचाखच भरिएको थियो । बाटोभरि काव्यपान, रसपान गर्दै पोखराबाट काठमाडौं फर्किंदा एक साता लागेको थियो ।’

अग्रज र अनुज मुक्तककारका चोटिला मुक्तक सुन्न शनिबार पोखरा उद्योग वाणिज्य संघमा दर्शक खचाखच भरिएका थिए । करिब २ घण्टा चलेको कार्यक्रममा २९ मुक्तककारले आफ्ना ३÷३ वटा मुक्तक सुनाए ।

पोखरा माइती भएको भन्दै साहित्यकार उषा शेरचनले भनिन्–

‘पाखा पखेरामा बसुँ भने पहिरो जाला कि भन्ने डर
खोलाको छेउमा बसुँ भने पनि बाढी आउला कि भन्ने डर’

करिब २ घण्टा चलेको मुक्तकिलो साँझमा अन्त्यमा आए, सरुभक्त । उनले विगतको स्मरण गर्दै पोखरामा मुक्तकको अध्याय थपिएको बताउँदै मुक्तक यसरी सुनाए,

‘मानवता कुनै धातु हैन, त्यसलाई केहीले गाल्न सकिन्न
खङग्रङ्ग सुकेको मनलाई सलाई काँटीले बाल्न सकिन्न’

कार्यक्रमको आयोजकमा पोखरेली युवा साँस्कृतिक परिवारका पूर्वअध्यक्ष तथा साहित्यकार सरस्वती प्रतिक्षा, बुन्द राणा, रामकाजी कोन, रुद्र ज्ञवाली, रमेश श्रेष्ठ, डा ईश्वरमणि अधिकारी, दीपक समीम, सुरेश रानाभाट, सरस्वती श्रेष्ठ सारु, मान क्षत्रिय, लामा क्षत्रिय लगायतको उपस्थिति रहेको थियो । गौरी तमु, शिव त्रिपाठी, डा.भूमिराज बस्ताकोटी, जीवनसागर भण्डारी, सरला लामिछाने ‘सरु’, प्राञ्जल, कपिल शर्मा, रुपेन्द्र अधिकारी ‘कटु’, सावित्री गिरी, कृष्ण सुवेदी, रामजीप्रसाद आचार्य, अमृत सुवेदी, सञ्जीव पौडेल, श्रीलंका गौतम गिरी, डा. ‘, अमृता पोखरेल, हेतले मुक्तक सुनौं मञ्च उक्लिए।

आयोजक संस्थाका अध्यक्ष उपेन्द्र पौडेलले विगतमा २ रुपैयाँ टिकटमा मुक्तक कार्यक्रम भएको स्मरण गरे । साहित्यको श्रीवृद्धिका लागि आफूहरुले यो कार्यक्रमलाई निरन्तरता दिएको बताए । पोखराका मेयर धनराज आचार्यले उद्घाटन गरेको कार्यक्रमको संचालन संस्था उपाध्यक्ष रीता अधिकारीले गरेकी थिइन् ।

(११ पटक भ्रमण गरिएको, आज ११ पटक भ्रमण गरिएको)