मिराकल फिल्म्सले आयोजना गरेको ‘अल वुमन डकुमेन्ट्री फिल्म मेकिङ वर्कसप’ सम्पन्न भएको छ। पुस २७ देखि माघ १४ गतेसम्म चलेको वर्कसपमा १८ देखि २५ वर्ष उमेर समूहका १२ जना सहभागी भएका थिए।
‘कनेक्टहर फिल्म्स फेस्टिभल’ र ओस्कार फिल्म्स कलेजको सहयोगमा आयोजित कार्यशालामा वृत्तचित्र परिकल्पनादेखि निर्माण तथा वितरणसम्मको प्रशिक्षण दिइएको थियो।
कार्यशालामा ८ जना प्रशिक्षकको मार्गनिर्देशनमा सहभागीहरुले चार वटा वृत्तचित्र बनाएका थिए। पहिलो दिन कथा परिकल्पनाबाट सुरु भएको कार्यशालामा सहभागीहरूले पात्र छनोट, पटकथा लेखन, छायांकन तथा सम्पादनबारे बुझ्दै वृत्तचित्र निर्माण र प्रदर्शन गरे।
कार्यशालामा रजिला श्रेष्ठले वृत्तचित्र परिकल्पना, राजन कठेतले कथा संरचना एवं प्रस्तुति र सुनिर पाण्डेले आइडिया पिचिङबारे प्रशिक्षण दिए।
यस्तै शुभांगी खड्काले पात्रसँगको अन्तर्वार्ता, बबिन दुलालले छायांकन तथा दृश्य संयोजन, सुदिल धितालले ध्वनि तथा संगीत, किरण श्रेष्ठले भिडियो सम्पादन र नवनिधि दाहालले वृत्तचित्र वितरणबारे प्रशिक्षण दिएका थिए।
कार्यशालाको अन्तिम दिन कार्यशालाको दौरान सहभागीहरुले निर्माण गरेको वृत्तचित्रको ओस्कार फिल्म कलेजमा प्रदर्शन गरिएको थियो।
कार्यशालामा चलचित्र वा वृत्तचित्र निर्माण र निर्देशनमा अनुभव नभएका महिलालाई सहभागी गराइ प्रयोगात्मक तालिम दिइएको मिराकल फिल्म्सकी संस्थापक तथा अल वुमन डकुमेन्ट्री वर्कसपकी संयोजक मीरा खड्काले बताइन्।
‘कहिल्यै डकुमेन्ट्री नबनाउनुभएका सहभागीले कथा र पात्र खोजेर, स्क्रिप्ट लेखेर, आफैंले छायांकन र सम्पादन गरेर १४ दिनमा वृत्तचित्र तयार गर्नु चुनौतीपूर्ण काम थियो। तर उहाँहरुले मेहनत र लगनका साथ निकै राम्रा वृत्तचित्रहरू बनाउन सफल हुनुभयो,’ उनले भनिन्।
समापन कार्यक्रममा वृत्तचित्रहरुको पहिलो ड्राफ्ट मात्र प्रदर्शन गरिएको मिराकल फिल्म्सका सुरज कटुवालले बताए। पोस्ट प्रोडक्सनमा साउन्ड र कलरको काम छिट्टै सकेर औपचारिक कार्यक्रमसहित विशेष प्रदर्शनी गर्ने योजना रहेको पनि उनले जानकारी दिए।
यस्तै, वृत्तचित्र प्रदर्शनीका क्रममा कार्यशालाकी सहसंयोजक युबिना भट्टराईले वृत्तचित्र बनाउन सहभागीहरुले गरेको मेहनतको प्रशंसा गरिन।
कार्यशालामा सम्पदा वाग्ले र मोनिका थापाले ‘अ फेमिनिस्ट ड्राइभ’ वृत्तचित्र बनाएका थिए भने रेबिका कुँवर, आरजु पराजुली र आँचल ढकालको टोलीले ‘स्टल नम्बर २’ निर्माण गरेको थियो।
यसैगरी, प्रतिभा कुलुङ र शैली मल्लले ‘अ सङ फ्रम एबी’ र रुपासी दुलाल, रिदिमा कँवर क्षेत्री र सुस्मिता बोगटीले ‘ट्रिलियम’ वृत्तचित्र बनाएका थिए। सहभागीहरुले सो कार्यशालाबाट वृत्तचित्र बनाउन मात्र नभएर नयाँ आयामबाट आफ्नो र आफू वरपरका जीवनलाई हेर्न समेत सिकिएको बताए।
नेपालको चलचित्र वृत्तमा महिला फिल्मकर्मीहरु कम भएको महसुस गरेका कारण सो कार्यशाला आयोजना गरिएको मिराकल फिल्म्सले बताएको छ।
प्रकाशित: १४ माघ २०८० २२:२५ आइतबार