राजविराज । जनसरोकार तथा आफ्नो अधिकारसहितको सात बुँदे माग राखी राजविराज नगरपालिकाका वडा सदस्यहरु आन्दोलित भएका छन् । यसैक्रममा आइतबार कार्यवाहक नगरप्रमुखलाई सात बुँदे मागसहितको ज्ञापनपत्र बुझाउँदै सात दिनभित्र माँग पुरा नगरिए आन्दोलन चर्काउने चेतावनी समेत वडा सदस्यहरुले दिएका छन् ।
सात बुँदे मागसहित नगरपालिकालाई सात दिने अल्टिमेटम
१६ वटा वडा रहेको राजविराज नगरपालिकामा हाल ६३ जना वडा सदस्य छन् । जसमध्ये पहिलो दिनको कार्यक्रममा ४४ जनाको सहभागिता रहेको वडा सदस्य रमानन्द देवले जानकारी दिए ।
कार्यवाहक नगरप्रमुख इसरत परविनलाई बुझाइएको सात बुँदे मागसहितको ज्ञापनपत्रको पहिलो नम्बरमा बिटोरी जग्गाको समस्या अविलम्ब समाधान गर्न माग गरिएको छ ।
नगरको मुख्य बजार क्षेत्रमा वर्षौदेखी बसोवास गर्दै आएका बिटोरी जग्गावाहक ५ हजार भन्दा बढी परिवार विगत सात वर्षदेखी समस्या पर्दा विक्रि गर्न र बैंकमा राखेर ऋण समेत लिन सकेका छैनन् । बुबा बाजे पालादेखी रहेको आफ्नो जग्गा समस्या पर्दा बैंकमा धितो राखेर ऋण समेत लिन नपाउँदा कतिपय समस्या परेका बेला साहु महाजनसँग चर्को ब्याजमा ऋण लिन बाध्य भएका छन् ।
ऋणको बोझ सहन नसक्दा कतिपयले आत्महत्या गरेको घटनासमेत सार्वजनिक भएको छ । यस्तै नगरपालिकाको अधिकांश फाँटका कर्मचारी कार्यालय समयमै नआउने र आएकाले पनि पुरै समय नबस्ने, काममा ढिलासुस्ती, नगरसभाबाट पारित भएका योजनाहरुको एक साताभित्र सम्झौता र कार्यान्वयन, ढल निकास, डम्पिङसाइट, छाडा पशुचौपाया नियन्त्रण, काँजी हाउसको व्यवस्थापन तथा नगरको मुख्य क्षेत्रमा सिसिक्यामरा जडान लगायतका कार्य अविलम्ब सुरु गर्न माग गरिएको छ ।
यस्तै नगरको सुरक्षाका लागि नगरप्रहरीको भर्ना, प्रहरी निकायको समन्वयमा प्रभावकारी रात्री गस्तीको व्यवस्था तथा स्थानीय सरकार संचालन ऐनमा अधिकार प्रत्यायोजन सम्बन्धी भएको व्यवस्था अनुसार वडा सदस्यहरुलाई अधिकार र जिम्मेवारी दिनु पर्ने माग समेत गरिएको छ ।
उक्त मागहरु सात दिनभित्र पूरा नगरिए बाध्य भई आन्दोलन चर्काउने र यसको सम्पूर्ण जिम्मेवारी नगरपालिका नै हुने ज्ञापनपत्रमा उल्लेख गरिएको छ ।
ज्ञापनपत्र बुझ्दै कार्यवाहक नगरप्रमुख परविनले उक्त समस्या समाधान गर्न आफू गम्भिर रहेको र छिट्टै बैठकबसी समाधान खोजिने प्रतिबद्धता जनाएकी थिइन् ।
(44 पटक भ्रमण गरिएको, 1 भ्रमण आज)