कपिलवस्तु । देशभरका पालिकामा आधारभूत अस्पताल बन्दै गरे पनि ग्रामीण तथा दुर्गम क्षेत्रमा स्वास्थ्यको पहुँच अझै सम्म पनि पुग्न सकेको छैन । दूर दराजका जनताहरू गुणस्तरीय सेवाको पहुँच लिनका लागि धेरै टाढा पुग्न बाध्यता रहेको छ ।

अधिकांश पालिकाहरूमा सबै किसिमको स्वास्थ्य सेवा नहुँदा मानिसहरूले चर्को मूल्य तिर्ने, समयमा उपचार नपाउने लगायतका विभिन्न सास्ती खेप्नु पर्ने बाध्यता पनि छ । ग्रामीण दुर्गम तथा स्वास्थ्यको पहुँचबाट टाढा रहेका जनताको लागि बुद्धभूमि नगरपालिकाले निःशुल्क स्वास्थ्य शिविर सञ्चालन गर्दा स्थानीयले गाउँमा अस्पताल खुलेको महसुस गरेका छन् । निःशुल्क स्वास्थ्य शिविरले गर्दा धेरै नागरिकलाई स्वास्थ्यको क्षेत्रमा राहत मिलेको छ । गाउँमै निःशुल्क स्वास्थ्य सेवा पाउँदा स्थानीय खुसी भएका छन् ।

१६ जना डाक्टरद्वारा उपचार
डा. सुनिल शर्माको नेतृत्वमा १६ जना विशेषज्ञ डाक्टरहरू शिविरमा संलग्न थिए । शिविरमा मुटु, मिर्गौला, आँखा, नाक, कान, घाटी, छाला तथा यौन रोग, हाड जोर्नी तथा नशा, मानसिक रोग, महिला तथा स्त्री विशेषज्ञ सेवा, वाल रोग, दाँत रोगको चेकजाँच र उपचार गरिएको थियो ।

‘यही औषधी लिन अन्यत्र जाँदा धरै रकम खर्च हुन्थ्यो, समय पनि बढी लाग्थ्यो ।’ औषधी लिएपछि बुद्धभूमि नगरपालिकाकी जानकी भुसालले भनिन्, ‘शिविरले हामी जस्ता ग्रामीण भेगका नागरिकलाई धेरै राहत मिलेको छ ।’नारायण बेल्बासे ढाड र घुँडा दुख्ने समस्याको समाधान खोज्न शिविरमा आए । शिविरमा निःशुल्क औषधी पाएपछि शिविर आयोजना गर्ने नगरपालिका र उपचार गर्ने डाक्टरहरूप्रति धन्यवाद दिए । ‘न्यूनतम पनि बुटवल जाँदा–आउँदा पैसा र समय बढी खर्चनुपर्थ्यो ।’ उनले भने, ‘बल्ल स्थानीय सरकार भएको अनुभव हुन थालेको छ ।’ त्यसका साथै उहाँले आगामी दिनमा बुद्धभूमि नगरपालिकामै सुविधा सम्पन्न अस्पताल समयमै सञ्चालनमा आए धेरै नागरिक लाभान्वित हुने सुझाव दिए ।

शिविरमा पुरुषभन्दा महिला बढी
पुस ६ गते एक दिन सञ्चालन भएको स्वास्थ्य शिविरमा पुरुषभन्दा बढी महिलाले सेवा लिएका छन् । शिविरमा २ हजार बढीले सेवा लिएको बुद्धभूमि नगरपालिकाका स्वास्थ्य शाखा प्रमुख विष्णु देव खनालले बताए। जसमध्ये एक हजार चार सय बढी महिला र सात सय बढी पुरुषले सेवा लिएका छन् । शिविरमा २०० बढीले भिडियो एक्स–रे तथा २५० बढीले ई सिजी सेवा लिएको नगरपालिकाले जनाएको छ ।

बुद्धभूमि नगरपालिकाका प्रमुख केशव कुमार श्रेष्ठले जनताको स्वास्थ्यसम्बन्धी अधिकार प्रत्याभूत गराउन शिविरको आयोजना गरिएको बताए । ‘संविधानमा नै जनताले स्वास्थ्य सेवा अधिकार उल्लेख गरिएको छ ।’ उनले भने, ‘त्यसैलाई पुरा गर्न र स्थानीय सरकारको प्रत्याभूत गराउन शिविरको आयोजना गरेका हौँ ।’

२०७७ साल देखि निःशुल्क स्वास्थ्य शिविरमा केएमसी अस्पताल
अस्पतालले एक वर्षमा १ सय भन्दा बढी स्वास्थ्य शिविर सञ्चालन गर्दै आएको छ । पछिल्लो महिना काभ्रे, रसुवा, प्युठान, दाङ जिल्लाका पालिकामा शिविर सम्पन्न गरेको छ । स्वास्थ्य शिविरमा विपन्न, सीमान्तकृत वर्ग, वृद्ध वृद्धा स्वास्थ्यको पहुँच नपुगेका दूर दराजका विरामकीको चाप रहेको चिकित्सकहरू बताउँछन् ।

स्वास्थ्यको सेवाको पहुँच नभएको क्षेत्रमा पालिका सँग समन्वय गरी शिविर सञ्चालन गर्दै आएको डा सुनिल शर्माले बताए। काठमान्डुको लच्छीफेदीकाबाट सुरु गरिएको शिविर सोलुखुम्बु, खोटाङ, भोजपुर अछाम काभ्रे, रसुवा, प्युठानका अत्यन्त विकट तथा दुर्गम पालिकामा समेत सञ्चालन गरिएको शर्माले बताए । शिविर पूर्णता निःशुल्क हुने काठमान्डु मेडिकल कलेज तथा नेवेल मेडिकल कलेजका सञ्चालक तथा सङ्घीय सांसद सुनिल शर्माले बताए ।

(१० पटक भ्रमण गरियो, आज १० पटक)