काठमाडौं । गत सोमवारयता लगातार तीन दिन कीर्तिमान कायम गरेको सुनको मूल्यमा आइतवार पनि नयाँ रेकर्ड कायम भएको छ । आज एकैदिन प्रतितोला १ हजार रुपैयाँले बढेको सुनको भाउ हालसम्मकै उच्च कायम भएको हो । नेपाल सुनचाँदी व्यवसायी महासंघका अनुसार आज सुन प्रतितोला १ हजार ८०० रुपैयाँ बढेर १ लाख २० हजार ८०० रुपैयाँ तोकिएको छ । यसअघि गत बुधवार र बिहीवार सुनको मूल्यमा कीर्तिमान कायम भएको थियो । शुक्रवार सुनको मूल्य प्रतितोला १ लाख १९ हजार रुपैयाँ तोकिएको थियो ।

गत सोमवार नयाँ कीर्तिमान बनाएको सुनको भाउ तोलाको १ लाख १७ हजार ४०० रुपैयाँ कायम भएको थियो । त्यसको भोलिपल्ट (मंगलवार) पनि सुनको भाउले नयाँ कीर्तिमान बनायो । उक्त दिन सुन तोलाको १ लाख १७ हजार ७०० रुपैयाँमा कारोबार भएको थियो । सुनको भाउमा बढ्ने क्रम बुधवार पनि रोकिएन । उक्त दिन सुनको मूल्य तोलाको १ हजार ६०० रुपैयाँ बढेर १ लाख १९ हजार ३०० रुपैयाँ कायम भयो । बिहीवार पनि सोही मूल्यमा सुनको खरीदविक्री भयाे । तर, शुक्रवार सुनको भाउ तोलामा ३०० रुपैयाँ घट्यो । 

अघिल्लो आइतवार (मङ्सिर १०)को तुलनामा आज सुनको भाउ तोलामा ३ हजार ९०० रुपैयाँ बढिसकेको छ । अघिल्लो आइतवार सुन तोलाको १ लाख १६ हजार ९०० रुपैयाँमा कारोबार भएको थियो । 

त्यसैगरी, आज चाँदीको मूल्य पनि बढेको छ । आज चाँदी प्रतितोला १ हजार ५४५ रुपैयाँमा कारोबार हुँदैछ । गत शुक्रवार चाँदी प्रतितोला १ हजार ५४० रुपैयाँ तोकिएको थियो ।