सुजन थपलियाको सतकका बाबजुद कोसीलाई हराउँदै नेपाल पुलिस क्लबले जारी प्रधानमन्त्री कप पुरुष राष्ट्रिय एकदिवसीय क्रिकेट प्रतियोगितामा दोस्रो जित निकालेको छ।
मंगलबार नै सूर्य तामाङको ह्याट्रिक प्रेरणामा बागमती प्रदेशले तेस्रो खेलमा पहिलो सफलता आत्मसात् गरेको छ। पुलिसले मंगलबार कीर्तिपुरस्थित त्रिभुवन विश्वविद्यालय (टियु) क्रिकेट मैदानमा कोसीलाई सात विकेटले हराएको हो।
सुजनको सतकका बाबजुद कोसीले सहजै पुलिसलाई सुम्पिँदै तेस्रो हार सामना गर्यो। टियुमा निकै खराब ब्याटिङ गरेको कोसी ४८.२ ओभरमा एक सय ६६ रनमै अलआउट भयो। जबाफी ब्याटिङ गरेको पुलिसले सामान्य लक्ष्य २३.१ ओभरमै मात्र तीन विकेट गुमाएर पूरा गर्यो। ओपनरद्वय सुनिल धमला १६ रन र कुशल भुर्तेल १२ रनमा आउट भएपछि पुलिसको सुरुआत राम्रो भएन।
तर, कप्तान दीपेन्द्रसिंह ऐरीले ३८ रन र अर्जुन साउदले ६२ रनको अविजित इनिङ खेल्दै १६१ बल अगावै पुलिसको जित सुरक्षित गराए। यी दुईले ७३ रनको अविजित साझेदारी गरे। दीपेन्द्रले १७ बलमा चार चौका र दुई छक्का प्रहार गरे। अर्जुनको इनिङमा पाँच चौका र दुई छक्का रह्यो। त्यसअघि दिलिप नाथले ३१ बलमा दुई चौका र एक छक्कासहित ३१ रनको योगदान दिए। कोसीका कमल खत्रीले दुई तथा सोनी मण्डलले एक विकेट लिए पनि पुलिसलाई कुनै चुनौती भएन।
त्यसअघि टस हारेर ब्याटिङको निम्तो पाएको कोसीले सुजनको १०५ रनको सतकीय इनिङका बाबजुद ४८.२ ओभरमा अलआउट हुनुअघि एक सय ६६ रन मात्र जोड्न सक्यो। सुजनले १२६ बलमा आठ छक्का र ६ चौका प्रहार गरे।
अन्य ब्याटर लामो समय क्रिजमा टिक्न नसक्दा कोसी सस्तैमा समेटियो। अभ्यास तिमिल्सिनाले २३ रन र कप्तान अंकित सुवेदी १० रनबाहेक अन्यले दोहोरो अंकमा रन बटुल्न सकेनन्। सुजनले आठौं विकेटका लागि अभ्याससँग ९९ रनको साझेदारी गर्दै सम्मानजनक योगफलतर्फ अग्रसर गराए। पुलिसको बलिङमा करण केसीले ९.२ ओभरमा तीन विकेट लिँदा २८ रन खर्चिए।
उनी म्यान अफ दी म्याचसमेत भए। ललितनारायण राजवंशी र सुनिल धमलाले समान दुई तथा रासिद खान, सागर ढकाल र कुशलले समान एक विकेट लिए। पुलिसले दोस्रो खेलमा शतप्रतिशत जित कायम राख्दा कोसीले भने तेस्रो हार सामना गर्यो।
मूलपानी क्रिकेट मैदानमा सूर्य तामाङको ह्याट्रिकप्रेरित बागमतीले मधेश प्रदेशलाई ८६ रनले हराउँदै तीन खेलबाट पहिलो दुई अंक जोड्यो। लगातार दोस्रो हार बेहोरेको मधेशको पनि तीन खेलबाट दुई अंक नै छ।
बागमतीले दिएको एक सय ९१ रनको लक्ष्य पछ्याएको मधेश १९ ओभरमा १ सय ४ रनमै समेटियो। मधेशका पवन सर्राफले ४५, मायन यादवले ३१ र नीरज यादवले १५ रनबाहेक अन्यले दोहोरो अंकमा रन जोड्न सकेनन्। २९औं ओभरमा सूर्यको सनसनीपूर्ण बलिङसामू मधेशका ब्याटर निरीह बन्यो।
यो ओभरमा सूर्यले ह्याट्रिकसहित चार विकेट लिए। पहिलो तीन बलमा क्रमशः रूपेश सिंहलाई २ रन, राजेश यादव र सांसद अन्सरीलाई शून्यमा पवेलियन फर्काउँदै सूर्यले ह्याट्रिक पूरा गरे। उनले अन्तिम बलमा रन्जित कुमारलाई पनि आउट गर्दै यो ओभरको चौथो सफलता पाए।
कुल ९ ओभरमा सूर्यले तीन मेडनसहित ६ विकेट लिँदा १८ रन मात्र खर्चिए। प्रतिश जिसी र इशान पाण्डेको नाममा समान दुई विकेट रह्यो। त्यसअघि टस हारेर ब्याटिङको निम्तो पाएको बागमतीले ४९.२ ओभरमा सबै विकेट गुमाउँदै एक सय ९० रनको सामान्य योगफल बनाएको थियो। तर, ब्याटिङमा साथ नपाउँदा मधेश असफल भयो।
खराब ब्याटिङ गरेको बागमतीका लागि प्रतिश जिसीले नवौं नम्बरमा ब्याटिङ गर्दै अर्धसतक बनाए। ३०.३ ओभरमा बागमती १०३/७ को नाजुक अवस्थामा थियो। तर, प्रतिशले ५९ रन जोड्दै टोलीको इनिङ उकासे।
रविन जोशीले २१, इशान पाण्डेले १५, विपिन आचार्यले १३, कप्तान रित गौतमले १२ र रिजन ढकालले ११ रन बनाए। मधेशको बलिङमा रूपेश सिंह र अर्निको यादवले दुई तथा राजेश यादव, पवन सर्राफ, कप्तान हरिशंकर शाह र रन्जित कुमारले समान एक विकेट लिए।
प्रकाशित: २ माघ २०८० १८:५२ मंगलबार