काठमाडौं । चलचित्र रँगेलीको छायाँकनको क्रममा मोरङको रँगेलीमा थिए अभिनेता अर्पण थापा । मधेशको भेषभुसामा सजिएका उनी सुटिङ सेटबाट बाहिर निक्लँदा कसैले पनि अर्पणलाई पहाडिया भनेनन् । सबैले मधेसी ठानेर उनीसँग स्थानीय भाषामा कुरा गरे । तर यी अभिनेतालाई स्थानीय मैथिली भाषा राम्ररी नआउँदा उनी मधेसी हैनन भन्ने बल्ल त्यहाका बासिन्दाले महसुस गरे ।

नेपाली चलचित्रमा खलपात्रमा पछिल्लो समय सबैभन्दा बढी देखिन कलाकार हुन अर्पण थापा । उनी बहुसँख्यक चलचित्रमा खलनायककै रुपमा प्रस्तुत हुँदै आएका छन् । खलचरित्रमा अहिले यी अभिनेताको व्यस्तता लोभलाग्दो छ ।

यतिबेला यी अभिनेता बागमतीका मेयर भरत थापाको जीवनीमा आधारित चलचित्र ‘मेयर’को छायाँकनमा छन् । तर यो पछि थप तीनवटा चलचित्रमा उनी अनुबन्धित भईसकेका छन् । अहिले एकातिर चलचित्र मेयरको छायाँकनको चटारो त छ नै । अर्को तर्फ चलचित्र रँगेलीको रिलिजको तयारीमा उनी त्यत्तिकै व्यस्त छन् ।

यही २५ फागुनबाट रिलिज हुने रँगेलीमा उनी अभिनेता दयाहाङ राईलाई परिचालन गर्ने स्थानीय डनको भूमिकामा छन् । आफ्नो भूमिका’bout यी अभिनेताले भने,‘मेरो चलचित्रलाई खलनायक र गुन्डा नभनेर एन्टी हिरोको रुपमा सम्बोधन गर्दा राम्रो होला । किनकी यो चलचित्रमा म दुई नम्बरी काम गरेर आर्थिक रुपमा सम्पन्न भएपछि आफ्नो चरित्रलाई सङ्लो देखाउन राजनीतिमा लागेको भगवान दादाको चरित्रमा छु ।’ अभिनेता अर्पणले भने,‘ठेक्का पट्टा, तस्करी र गुन्डागर्दीबाट पैसा कमाएर आफ्नो चरित्र राम्रो देखाउनकै लागि यहाँ राजनीतिमा लागेकाहरु धेरै छन् । यो चलचित्रमा मेरो भूनिका पनि लगभग त्यस्तै हो ।’

अर्पणलाई चर्को अभिनय गर्ने कलाकारको आरोप पनि नलागेको हैन । तर आफुले चर्को अभिनय गरेकै चलचित्र हिट भएको यी अभिनेताले दाबी गरेका छन् । आफुले पछिल्लो समय चर्को अभिनय गरेको चलचित्र दिमाग खराब हिट भएको बताउँदै चर्को अभिनय रहेको आफ्नो सिनेमा नै दर्शकले रुचाएको अर्पणले जिकिर गरे । केही चलिचत्रमा आफ्नो अभिनय चर्को भएको स्विकार्दै अर्पणले भने,‘मलाई चलचित्रका निर्देशकले नै चर्को अभिनय गराउनु हुन्छ । उहाँहरुले जस्तो अभिनयको माग गर्नु हुन्छ, मैले त्यस्तै काम गर्नु प¥यो नी हैन र ?’

एकसमय नाटक खेल्दै जिबिकोपार्जनका लागि उनी काठमाडौंका महाबौद्धमा नेपाली तथा बिदेशी चलचित्रको सिडी बिक्री गर्थे । त्यतिबेला उनले धरै फिल्म हेर्ने अबसर पाए । एकदिन बिदेशी निर्देशक मुर्रे केरले उनलाई नेपाली र अँग्रेजी भाषाको चलचित्र ‘सिक सिटी’मा मुख्य भूमिकामा चयन गरे । यो चलचित्रमा एउटा ससक्त भूमिकामा उनले अभिनय गरे । यो चलचित्रमा उनको अभिनयले निकै चर्चा पायो ।

यही क्रममा उनी नेपाली चलचित्र ब्याच नम्बर १६ र धन्दामा आबद्ध भए,‘यी दुबै चलचित्रमा ग्रे शैलीको भूमिकाकै कारण दर्शकले मलाई रुचाउनु भयो । त्यसपछि मैले धेरै जसो फिल्ममा यस्तै भूमिका पाउँदै आएको छु ।’ अर्पणले भने ।

यसपछि बधसाला, छड्के, मौन, मुखौटो जस्ता चलचित्रबाट उनी नेपाली चलचित्र उधोगमा खल चरित्रको रुपमा स्थापित भए । त्यसपछिबाट भने आफु पूर्ण रुपमा व्यबसायिक कलाकार नै भएको अर्पणको कथन छ ।

त्यसो त अर्पणले केही चलचित्रमा सकरात्मक भूमिका पनि निर्वाह गरेका छन् । तर उनलाई दर्शकले बढीजसो खल चरित्रमौ रुचाएका छन् । त्यसैले पनि आफु अधिकाँस चलचित्रमा खलचरित्रको रुपमा प्रस्तुत हुँदै आएको यी अभिनेताको कथन छ,‘रिलिज हुन लागेको चलचित्र रँगेलीमा पनि शिर्ष खलनायकको रुपमा छु । यो चलचित्रमा पनि दर्शकले मलाई एउटा फरक भूमिकामा देख्नु हुनेछ ।’

समाजमा नायकसँगै खलनायक पनि हुनुनर्पे यी अभिनेताको कथन छ । चलचित्र रँगेलीले पनि खलनायकहरु समाजमा कसैका लागि नायक पनि हुने गर्दछन भन्ने सन्देश दिने अर्पणको कथन छ,‘सोही कारण पनि मैले आफुलाई यो चलचित्रमा एन्टी हिरोको रुपमा स्थापित गर्न चाहेको हुँ ।’

(६५ पटक भ्रमण गरिएको, आज ६५ पटक भ्रमण गरिएको)