प्रथम ‘मधेश प्रदेश सभामुख क्रिकेट कप–२०८०’ को उपाधि धनुषाले चुमेको छ। आज भएको फाइनल खेलमा सिरहालाई पाँच विकेटले धनुषाले जित हासिल गरेको हो।
शनिबार रामजानकी बहुउद्देश्य अन्तर्राष्ट्रिय रंगशालामा टस जितेर पहिला ब्याटिङ रोजेको सिरहाले निर्धारित ४० ओभरमा ९ विकेट गुमाएर एक सय ३५ रनको लक्ष्य धनुषा समक्ष प्रस्तुत गरेको थिए।
सिरहाका लागि प्रदिप पासवानले सर्वाधिक ४४ बलमा २१, राकेश कामती २४ बलमा १९ र कप्तान पृथ्वी यादव नटआउट १५ बलमा १२ रन बनाए। सिरहाको ओपनर दिपेश दास र शैलेन्द्र साह मात्र १२/१२ रन बनाउन सके।
सिरहाको पहिलो विकेट २१, दोस्रो ४०, तेस्रो ४२ र चौथो विकेट ५२ रनमा गुमेको थियो। धनुषाका लागि बलिङ गरेका रुपेश यादवले आठ ओभरमा ३५ रन खर्चेर तीन र विक्रान्त यादव यादव आठ ओभरमा २४ रन खर्चेर तीन विकेट लिए। कप्तान विशाल शुशलिङ र आखिलेश ठाकुरले पनि एक/एक विकेट लिए।
जवाफी ब्याटिङका लागि आएका धनुषा २९ ओभर ३ बलमा पाँच विकेट गुमाएर लक्ष्य पुरा गरेको थियो। धनुषाका लागि कप्तान विशाल शुशलिङ सर्वाधिक ५२ बलमा ३७ र रुपेश यादव नटआउट ४८ बलमा ३६ रनको योगदान दिए।
ओपनर म्यान यादव १६ र हिमाशु दत्तले २१ रन बनाए। सिरहाका लागि बलिङ गरेका प्रदिप पासवानले आठ ओभरमा २१ रन खर्चेर तीन र अफरुदिन राइनले दुई विकेट लिए।
यस खेलको म्यान अफ दी म्याच धनुषाका रुपेश यादव घोषित भए। म्यान अफ दी सिरिज पनि रुपेश नै भए। उनले कपमा पाँच विकेट र ५२ रन बनाएका थिए।
वेस्ट ब्याटस म्यान धनुषाकै अकबर अलि भए। मधेश प्रदेशसभाले छैठौं वार्षिकोत्सवको अवसरमा क्रिकेट कप आयोजना गरेको थियो। नकआउट प्रणालीमा खेलाइएको कपमा धनुषाले सप्तरी, बारा र सिरहालाई पराजित गरी प्रथम सभामुख कपको ‘च्याम्पियन’ बनेको हो।
समापन कार्यक्रमलाई सम्बोधन गर्दै सभामुख रामचन्द्र मण्डलले खेलकुदको गतिविधि बढाउने उद्देश्यले सभामुख कप गराइएको प्रष्ट पारे।
उनले क्रिकेटसँगै मौलिक खेलहरुको पनि विकास हुनुपर्ने जिकिर गरे। खेलले सबै क्षेत्रमा व्यापक विकास गर्ने हुनाले सबै पक्षलाई खेलकुदमा ध्यान दिन सुझाए।
प्रकाशित: २० माघ २०८० १८:०३ शनिबार