संस्कृति इन्टरनेसनल स्कुलले ‘संस्कृति स्पोर्टस् सम्मान २०२३’ नेसनल क्रिकेट आइकन कुशल मल्ललाई प्रदान गरेको छ।
स्कुलले प्रतिभाशाली खेलाडीहरुलाई प्रोत्साहन प्रदान गर्ने उद्देश्यले २०२२ मा स्थापना गरेको यो अवार्ड खेलकुद विधामा उत्कृष्ट प्रदर्शन गर्ने एक खेलाडीलाई हरेक वर्ष प्रदान गर्दै आइरहेको छ।
मल्ल एसियन गेम २०२३ को उद्घाटन खेलमा मङ्गोलिया विरुद्ध टी २० इन्टरनेसनल क्रिकेटमा ३४ बल खेल्दै विश्व कीर्तिमानी शतक बनाउने पहिलो खेलाडी बन्न सफल भएका थिए।
कुशल मल्ललाई उक्त अवार्ड स्कुलका चेयरपर्सन रञ्जित आचार्य र डाइरेक्टर दिप्ती आचार्यको उपस्थितिमा कार्यक्रमका प्रमुख अतिथि एवम् नेपाली राष्ट्रिय क्रिकेट टोलीका पूर्व कप्तान पारस खड्काले हस्तान्तरण गरेका हुन्। अवार्डको साथै मल्ललाई रु. १,०१,००० रकमको चेक पनि प्रदान गरिएको थियो।
त्यसै गरी सोही कार्यक्रममा सोनी पाख्रिनलाई रु. ५०,००० बराबरको ट्रेनिङ स्कलरशिप पनि प्रदान गरिएको छ। यो स्कलरशिप व्यावसायिक तालिम लिन नसक्ने देशभरका १९ वर्षमुनिका खेलाडीहरू मध्य १ जना योग्य क्रिकेटरलाई प्रदान गरिन्छ। सोनी पाख्रिन हाल महिला राष्ट्रिय क्रिकेट टिममा आबद्ध छिन्।
स्कुलका चेयरपर्सन रञ्जित आचार्यले भने, ‘संस्कृति सदैव आफ्ना विद्यार्थीहरुको समग्र विकासमा ध्यान दिँदै सामाजिक विकासमा पनि योगदान गर्न प्रतिबद्ध रहेको छ। वार्षिक रुपमा प्रदान गरिने यस संस्कृति स्पोर्टस सम्मानमार्फत हामीले राष्ट्रिय प्रतिभाहरूलाई सम्मान गर्दै आफ्ना विद्यार्थीहरुमा सामाजिक उत्तरदायित्वको बोध गराउने लक्ष्य राखेका छौँ। कुशल मल्ल र सोनी पाख्रिनलाई हार्दिक बधाई एवम् उज्ज्वल भविष्यको लागि हार्दिक शुभकामना व्यक्त गर्न चाहन्छौँ।’
प्रकाशित: १२ पुस २०८० २२:५५ बिहीबार