विराटनगर। ‘मोरङ व्यापार संघ ट्रेड एक्स्पो २०२३’ मा सोमवार साँझ जम्मा भएको भीड देखेर मोरङका प्रमुख जिल्ला अधिकारी प्रेमप्रसाद भट्टराईले सोधे, ‘यतिका मानिस कहाँबाट आएका हुन् ?’ उनको जिज्ञासापछि मेला आयोजक संस्था मोरङ व्यापार संघका अध्यक्ष नविन रिजाल र पूर्वअध्यक्ष महेश जाजुले मेलाका अवलोकनकर्ता विराटनगर र आसपासका क्षेत्रबाट आएको बताए । सोमवार मात्रै करीब २५ हजार टिकट विक्री भएको उनीहरूले सुनाए ।
संघको दशदिने व्यापार मेलाको पाँचौं दिन मंगलवार साँझसम्म ७ करोड रुपैयाँभन्दा बढीको कारोबार भएको छ । एक्स्पोमा कृषिजन्य र औद्योगिक उत्पादनमा उपभोक्ताको भीड बढ्दो छ । पाँच दिनमा ८० हजारभन्दा बढीले मेला अवलोकन गरिसकेको संघका अध्यक्ष रिजालको बताए । मेलाका २५० ओटै स्टलमा उपभोक्ता र सर्वसाधारणको उल्लेख्य भीड छ । रिजालले भने, ‘अहिलेको शिथिल आर्थिक गतिविधिलाई एक्स्पोले केही हदसम्म चलायमान बनाएको छ ।’
सनम फलफूल उत्पादन तथा प्रशोधन केन्द्र, पाँचथरकी जुनु लावतीले मेलाको चार दिनमा ४० हजार रुपैयाँभन्दा बढीको कारोबार भएको बताइन् । ‘अरू समयमा दैनिक २ हजार रुपैयाँबराबरको किबी तथा त्यसका उत्पादन विक्री हुन पनि हम्मे पथ्र्यो,’ लावतीले भनिन्, ‘मेलामा दैनिक १० हजार रुपैयाँभन्दा बढीको विक्री भइरहेको छ ।’
विराटनगर–२ शंकरपुरमा सञ्चालित मेलामा औद्योगिक उत्पादनसहित कृषिउपज र भान्साका सामग्रीका स्टलमा मानिसको बढी भीड छ । राष्ट्रिय व्यापार रणनीति अन्तर्गत पहिचान गरिएका प्रदेशका कृषि उत्पादन र अन्तर प्रादेशिक व्यापार सम्भावना बोकेका वस्तु तथा सेवाको अन्तरराष्ट्रिय बजारीकरण गर्ने मेलाको लक्ष्य छ । स्थानीय अर्थतन्त्रलाई गति दिन मेलाले सहयोग पुग्ने अपेक्षा गरिएको मेला संयोजक अनिल साहले बताए । मेला चार लाखले अवलोकन गर्ने र करीब १५ करोड रुपैयाँको कारोबार हुने आयोजकको अनुमान छ । मेलामा स्वदेशका सहित भारत, पाकिस्तान र बंगलादेशका गरी २५० ओटा स्टल राखिएका छन् ।