काठमाडौं। मुक्तिनाथ विकास बैंक लिमिटेडले वार्षिकोत्सवको अवसरमा डिजिटल भुक्तानीमा प्रोत्साहन गर्न विभिन्न योजना सार्वजनिक गरेको छ । योजनाअनुसार बैंकले ‘टपअपमा टपअप धमाका’ सार्वजनिक गरेको हो । यस योजनामा मोबाइल बैंकिङमार्फत २०० रुपैयाँ वा सोभन्दा बढीको टपअप कारोबारमा दैनिक १८ जना ग्राहकले लक्की–ड्रमार्फत २०० रुपैयाँको टपअप प्राप्त गर्ने बताइएको छ । बिहीवार (आज)देखि शुरू भएको यो योजना आगामी बुधवारसम्म रहने बैंकले जानकारी दिएको छ । 

त्यस्तै बैंकले मोबाइल बैंकिङमार्फत हालसम्म बिजुली र इन्टरनेटको बिल भुक्तानी नगरेका ग्राहकले पहिलो पटक बिल भुक्तानी गरेमा भुक्तानी रकमको पाँच प्रतिशत वा अधिकतम ५० रुपैयाँसम्म प्राप्त गर्ने सुविधा ल्याएको छ । यो सुविधामा पहिलेदेखि बिल भूक्तानी गरिरहेका ग्राहकले यस अवधिमा पुन: भुक्तानी गर्दा लक्की ड्रमार्फत १ जनाले ५ महीनासम्मको बिल भुक्तानी वा अधिकतम ५ हजार रुपैयाँसम्म प्राप्त गर्ने बताइएको छ । यो माघ १९ गतेसम्म कायम रहने बताइएको छ । बैंकले हालसम्म क्यूआर मर्चेन्ट भई कुनै पनि कारोबार क्यूआरमार्फत प्राप्त नगरेका मर्चेन्टले यस अवधिमा एक पटक वा पटक पटक गरी ५०० रुपैयाँसम्मको कारोबार गर्दा लक्की ड्रमार्फत पाँचजनाले स्मार्ट वाच प्राप्त गर्न सक्ने बताइएको छ ।