बजार
अभियान संवाददाता
काठमाडौं। ग्लोबल आइएमई बैंक लिमिटेडले आफ्नो १७ औं वार्षिकोत्सवको अवसरमा कार्ड तथा मोबाइल बैंकिङमार्फत गरिने कारोबारमा १७ प्रतिशतसम्म छूट तथा १ हजार रुपैयाँसम्म क्यासब्याक गर्ने योजना सार्वजनिक गरेको छ । पुस १६ देखि माघ १७ गतेसम्मका लागि बैंकको भिसा डेबिट र क्रेडिट कार्ड तथा एससीटी कार्डबाट योजना अवधिभर पीओएस मेसिनमार्फत गरिने २० हजार रुपैयाँभन्दा माथिका १० ओटाभन्दा बढी कारोबारमा १ हजार रुपैयाँको क्यासब्याक उपलब्ध गराइने बताइएको छ ।
साथै नयाँ खाता खोली ग्लोबल स्मार्ट प्लस प्रयोग गर्ने ग्राहकले एसएमएसमा प्राप्त प्रोमो कोड प्रयोग गरी पहिलो पटकको क्यूआर कारोबार तथा मोबाइल रिचार्जमा १७ प्रतिशत वा अधिकतम १७० रुपैयाँसम्मको छूट पाउने बैंकले जानकारी दिएको छ । यो क्यासब्याक योजना पुस १७ देखि २३ गतेसम्म लागू हुने बताइएको छ ।
वार्षिकोत्सवको अवसरमा छात्रवृत्ति
बैंकले वार्षिकोत्सवको अवसरमा ‘ग्लोबल आइएमई छात्रालाई छात्रवृत्ति कार्यक्रम’अन्तर्गत विभिन्न सामुदायिक विद्यालयबाट कक्षा ६ उत्तीर्ण गरी कक्षा ७ मा प्रवेश गरेका विपन्नवर्गका ३५ जना जेहेनदार छात्राहरूलाई छात्रवृत्ति प्रदान गरेको छ । यी छात्राहरूलाई कक्षा १२ सम्मको अध्ययनका लागि बैंकले हरेक वर्ष छात्रवृत्ति प्रदान गर्ने बताइएको छ, जसअन्तर्गत प्रत्येक प्रदेशबाट ५ जना जेहेनदार छात्राहरू छनौट गरी जम्मा ३५ जना छात्रालाई वर्षको १२ हजार रुपैयाँको दरले छात्रवृत्ति प्रदान गरिने भएको हो । यो कार्यक्रमअन्तर्गत बैंकले अहिलेसम्म १०५ जनालाई छात्रवृत्ति व्यवस्था गरी छात्राहरूको शैक्षिक गुणस्तरमा योगदान गरिरहेको बताइएको छ ।
बैंकको नाफा बढ्यो
ग्लोबल आइएमई बैंकले चालु आर्थिक वर्ष (आव)को पहिलो त्रैमाससम्ममा १ अर्ब २२ करोड ५७ लाख ५४ हजार रुपैयाँ नाफा गरेको छ । गत आवको सोही अवधिमा बैंकको नाफा १ अर्ब १८ करोड ९५ लाख ४५ हजार रुपैयाँ थियो ।
यस्तै चालू आर्थिक वर्षको पहिलो त्रैमासमा बैंकको व्यवसाय विस्तार, व्याज आम्दानी, सञ्चालन खर्च र खुद शुल्क तथा कमिशन आम्दानी पनि वृद्धि भएको बैंकले जानकारी दिएको छ । बैंकले देश तथा विदेशका ११०० भन्दा बढी सेवाकेन्द्रबाट बैंकिङ सेवा प्रवाह गरिरहेको बताएको छ ।
असोज मसान्तसम्ममा बैंकको वितरणयोग्य मुनाफा ३ अर्ब ३२ करोड ३३ लाख रुपैयाँ रहेको छ भने प्रतिशेयर वितरणयोग्य मुनाफा ९ रुपैयाँ ९६ पैसा रहेको बताइएको छ । ३५ अर्ब ७७ करोड १० लाख रुपैयाँ चुक्ता पूँजी रहेको बैंकको जगेडा कोषमा २४ अर्ब ४३ करोड रुपैयाँ सञ्चित छ । तीन महीनामा बैंकको निक्षेप ३ दशमलव ९१ प्रतिशत बढेको छ भने कर्जा शून्य दशमलव २७ प्रतिशत बढेको छ । हाल बैंकको कुल पूँजी ५८ अर्ब ६८ करोड रुपैयाँ छ भने चुक्ता पूँजी ३५ अर्ब ७७ करोड रुपैयाँ रहेको बताइएको छ । बैंकले गत आर्थिक वर्ष ७ अर्ब २५ करोड रुपैयाँ नाफा आर्जन गरेको थियो ।
यस्तै बैंकले आर्थिक वर्ष २०७८/७९ मा ३ अर्ब २० करोड रुपैयाँ कर दाखिला गरी सरकारबाट सबैभन्दा बढी कर दाखिला गर्नेमा सम्मानित भएको पनि दावी गरेको छ ।
प्रतिक्रिया [0]