काठमाडौं । सानिमा बैंक लिमिटेडले गत आर्थिक वर्ष ०७९/८० को लाभांश प्रस्ताव गरेको छ । बैंकको भदौ २८ गते बसेको सञ्चालक समितिको बैठकले गत आर्थिक वर्षको मुनाफाबाट हाल कायम चुक्ता पूँजीको आधारमा कुल १४ दशमलव ७० प्रतिशत लाभांश वितरण गर्ने निर्णय गरेको हो ।
कुल लाभांशमध्ये ९ प्रतिशत बोनस शेयर र कर प्रयोजनसमेत ५ दशमलव ७० प्रतिशत नगद लाभांश रहेको बैंकले जानकारी दिएको छ ।
हाल बैंकको चुक्ता पूँजी १२ अर्ब ४६ करोड १ लाख १५ हजार रुपैयाँ छ । सोही पूँजीको आधारमा बैंकले लाभांश वितरण गर्ने तयारी गरेको हो ।
वाणिज्य बैंकहरूमध्ये यसअघि माछापुच्छ्रे बैंक र एभरेष्ट बैंकले लाभांश प्रस्ताव सार्वजनिक गरिसकेको अवस्थामा तेस्रो नम्बरमा सानिमा बैंकले लाभांश सार्वजनिक गरेको हो । बैंकको सञ्चालक समितिले प्रस्ताव गरेको यो लाभांश नेपाल राष्ट्र बैंकको स्वीकृतिपछि बैंकको आगामी साधारण सभाले पारित गरेपश्चात मात्र वितरण हुनेछ ।
बैंकले गत वर्षभन्दा यस वर्ष बढाएर लाभांश वितरण गर्न लागेको हो । गत वर्ष बैंकले अघिल्लो आर्थिक वर्ष ०७८/७९ को मुनाफाबाट १० प्रतिशत बोनस शेयर र कर प्रयोजनका लागि शून्य दशमलव ९८ प्रतिशत नगद लाभांश वितरण गरेको थियो ।