काठमाडौं । ऐतिहाँसिक अन्तर्राष्ट्रिय नेपाली चलचित्र गोर्खा वारियरको रिलिज अघि नेपालका तीन शहरमा रेड कार्पेट प्रिमियर गरिने भएको छ । यही ११ फागुनबाट देशव्यापी रिलिज हुने यो चलचित्रको रिलिज अघि नेपालका तीन शहरमा प्रिमियर गर्न लागिएको निर्देशक मिलन चाम्सले राजधानीलाई जानकारी गराए ।

‘गोर्खा वारियरको बेलायतमा हलिउड फिल्मको प्रिमियर केन्द्र मानिएको लिसेस्ट स्क्वायर लन्डनको प्रतिष्ठित आइम्याक्स सिनेवल्र्डमा गत भदौ २४ गते अन्तराष्ट्रिय ऐतिहाँसिक प्रिमियर गरिएको थियो । यतिबेला नेपालमा पनि प्रिमियर गरिनु पर्छ भन्ने सुझाब शुभेच्छुकहरुले दिएपछि हामीले तीन शहरमा रिलिज अघि नै प्रिमियर गर्न लागेका हौं ।’ चाम्सले भने ।

‘यो चलचित्रका मोफशल अन्तर्गत धरान र पोखरामा प्रिमियर तय गरिएको हो भने त्यसपछि काठमाडौंमा यसको प्रिमियर गरिने भएको छ । लाहुरेको शहर भनेर चिनिने धरान र पोखरामा रेड कार्पेट प्रिमियरको तयारी तिब्रगतिमा भईरहेको छ ।’ निर्देशक मिलन चाम्सले जानकारी गराउँदै भने, ‘हामीले यही ५ फागुनमा धरानमा र ७ फागुनमा पोखरामा रेड कार्पेट प्रिमियर गर्दैछौं । यी दुई शहरमा प्रिमियरको सफलतापछि ९ फागुनमा काठमाडौंको बिग मूभिजमा रेड कार्पेट प्रिमियर गरिने भएको छ ।’

निर्देशक चाम्सका अनुसार गोर्खा वारियर टिमले एक साताको मोफसल यात्रा सम्पन्न गरेर शनिबार टिम काठमाडौं फर्किएको छ । मोफसल यात्रामा यो चलचित्रका निर्माता निर्देशक एवम् लेखक मिलन चाम्स, अभिनेता रितेश चाम्स, अभिनेत्री रेबिका गुरुङ, व्यबस्थापक प्रेम खड्कालगायत थिए ।

यो चलचित्रको धरानबाट सुरु भएको मोफसल यात्रा धरानपछि हेटौंडा, नारायणघाट, बुटबल, पाल्पा हुँदै पोखरामा आएर सम्पन्न भएको हो । यात्राको क्रममा लाहुरेको शहर भनेर चिनिने मोफसलका यी स्थानलाई लक्षित गरेर त्यहाँका भूतपूर्व बृटिस गोर्खा सैनिक तथा स्थानीय संघ संस्थानका पदाधिकारीहरुसँग चलचित्र युनिटले भेटघाट गर्दै यो चलचित्र’bout जानकारी दिएको पनि चाम्सले बताएका छन् ।

यात्राको क्रममा गोर्खा वारियरका तर्फबाट चलचित्र पत्रकार संघको धरान, हेटौंडा, चितवन, बुटबल र पोखरा शाखाको सहयोगमा यी शहरमा पत्रकार भेटघाट तथा अन्तरक्रिया कार्यक्रम पनि आयोजना गरिएको छ । यी पाँच वटै शहरमा अन्तरक्रियाका क्रममा चलचित्र निर्देशक, अभिनेता र अभिनेत्रीले गोर्खा वारियर र सो चलचित्रमा आफ्नो काम’bout प्रकाश पारेको पनि निर्देशक चाम्सले जनाए ।

गोर्खा वारियर नेपाली, हिन्दी, अँग्रेजी र कोरियनगरी चार भाषामा निर्माण भएको छ । यो चलचित्रको नेपाली संस्करण तयार भईसकेको छ भने हिन्दी, कोरियन र अँग्रेजी सँस्करणको निर्माण पनि अन्तिम अबस्थामा पुगेको छ ।

गोर्खा वारियरमा निर्देशक मिलन चाम्स र गिरिराज घिमिरेको लेखन रहेको छ । यसमा रितेश चाम्स, विजय लामा, रेविका गुरुङ, शिशिर बाङ्देल, कविता आले, रियर राई, बिरूप घले, सारा राईलगायतका कलाकारहरुले अभिनय गरेका छन् ।

यो चलचित्र लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण भएको हो । गोर्खा वारियरको निर्मातामा सुमन राई, सुस्मिता वाइवा छन् । यसको कार्याकारी निर्मातामा प्रशान्त थापा, राजेन्द्र घिमिरे एवम् सहनिर्मातामा सुरेश राई रहेका छन् ।

(आज २ पटक, २ पटक भ्रमण गरिएको)