काठमाडौं । नेपाल बीमा प्राधिकरणले सरकारी स्वामित्वको राष्ट्रिय जीवन बीमा कम्पनी लिमिटेडलाई रूपान्तरित आधिकारिक प्रमाणपत्र प्रदान गरेको छ । प्राधिकरणले एक सूचना जारी गर्दै राष्ट्रिय बीमा संस्थानबाट राष्ट्रिय जीवन बीमा कम्पनीमा परिणत भएको आधिकारिक प्रमाणपत्र जारी गरिएको जानकारी दिएको हो ।
नेपाल सरकार मन्त्रिपरिषद्को कात्तिक १६ गते र प्राधिकरणको मंसिर १३ गतेको निर्णयबमोजिम साविकको राष्ट्रिय बीमा संस्थानलाई बीमा ऐन २०७९ को दफा १७२ को उपदफा (३) को खण्ड (क), (ख), (ग) र (घ) को व्यवस्थाबमोजिम कम्पनी रजिष्ट्रारको कार्यालयमा कात्तिक २० गते राष्ट्रिय जीवन बीमा कम्पनीको नाममा परिणत गरी दर्ता अभिलेख भएको हो ।
प्राधिकरणले बीमा ऐन, २०७९ का दफा ६१ को उपदफा (१) को खण्ड (क) बमोजिमको जीवन बीमा व्यवसाय गर्नेगरी जीवन बीमकको प्रमाणपत्र जारी गरिएको सूचनामा उल्लेख गरिएको छ ।
अब पब्लिक कम्पनीमा रूपान्तरण भएसँगै कम्पनीले सर्वसाधारणलाई आईपीओ निष्कासन गर्नुपर्ने छ । ऐनमा कुल जारी पूँजीको कम्तीमा ३० प्रतिशत शेयर सर्वसाधारणलाई छुट्याउने पर्ने व्यवस्था छ । हाल कम्पनीको चुक्ता पूँजी १८ करोड १० लाख रुपैयाँ छ ।
कम्पनीले आगामी एक वर्षभित्र ५ अर्ब रुपैयाँ चुक्ता पूँजी पुर्याउनुपर्ने छ । यसका लागि कम्पनीले सार्वजनिक निष्कासनमार्फत सर्वसाधारणलाई शेयर जारी गर्नुपर्दछ ।