राष्ट्रिय सभामा मधेस प्रदेशबाट सत्ता गठबन्धनका उम्मेदवार विजयी भएका छन्। सत्ता गठबन्धनको तर्फबाट नेपाली काँग्रेसका आनन्द प्रसाद ढुङ्गाना र जनता समाजवादी पार्टी (जसपा)की पुजा चौधरी विजयी भएकी हुन्।
ढुङ्गानाले सात हजार तीन सय ७० मत भार प्राप्त गरेका छन् भने गठबन्धनकै अर्का उम्मेदवार महिला तर्फकी चौधरीले सात हजार ९ सय २३ मत भार प्राप्त गरेकी छन्। उनको प्रतिद्वन्द्वी नेकपा एमालेका विजेता झाले दुई हजार चार सय ४६ मत भार प्राप्त गरिन भने एमालेकै अन्यतर्फका उम्मेदवार उषा देवी थरुनीले दुई हजार चार सय ८४ मत भार ल्याइन्।
सत्ता गठबन्धनबाट अल्गिएर उम्मेदवारी दिएका डा. सिके राउत नेतृत्वका जनमत पार्टीका उम्मेदवार रामशंकर महासेठले आठ सय १८ मत भार प्राप्त गरे भने जनमते महिलातर्फ उम्मेदवार उठाएका थिएनन्।
महेन्द्र नारायण निधि सांस्कृतिक केन्द्रमा रित्त दुई पदको लागि बिहीबार मतदान भएको थियो। कुल दश हजार आठ सय ३९ मत भार रहेको थियो। स्थानीयतर्फ दुई सय ६७ र एक सय सात प्रदेशतर्फ मतदाता रहेका थिए।
प्रकाशित: ११ माघ २०८० १७:०१ बिहीबार