प्रोफेसनल गल्फर रामे मगरले सूर्य नेपाल च्यालेन्जको पहिलो दिन सोमबार शीर्ष स्थानमा अग्रता  बनाएका छन्।

यो सूर्य नेपाल गल्फ टुर २०२३/०२४ को पाँचौं प्रतियोगिता हो। प्रतियोगिताको पहिलो दिन नै भेट्रान प्रोफेसनल गल्फर रामेले युवा गल्फर सद्भाव आचार्यमाथि एक स्ट्रोकको अग्रता बनाएका हुन्। सद्भाव डिफेन्डिङ च्याम्पियनसमेत हुन्।

रामेले तीन अन्डर ६५ को प्रदर्शन गर्दा सद्भावले दुई अन्डर ६६ सहित पहिलो दिनको खेल पूरा गरे। भुवन नगरकोटी र धनबहादुर थापा संयुक्त रूपमा तेस्रो स्थानमा रहे। यी दुईले एक अन्डर ६७ को प्रदर्शन गरे। इभन पार ६८ मा खेलेका टंकबहादुर कार्की पाँचौं  स्थानमा छन्।

रवि खड्का छैटौं स्थानमा छन्। उनले पहिलो दिन एक ओभर ६९ को प्रदर्शन गरे। रमेश अधिकारी, सूर्यप्रसाद शर्मा र दिनेश प्रजापति संयुक्त रूपमा सातौं स्थानमा छन्। तीनैले दुई ओभर ७० को स्कोरमा पहिलो दिनको खेल सकाए।

पशुपति शर्मा, जयराम श्रेष्ठ, दीपक मगर, तोरणविक्रम शाही, एमेच्योर गल्फरद्वय राहुल विके र टासी छिरिङले तीन ओभर ७१ को नतिजामा संयुक्त रूपमा दशौं स्थान बाँडे। ३६ होलको समाप्तिमा कट लागू हुनेछ। उत्कृष्ट २१ खेलाडीले तेस्रो र चौथो दिनका लागि स्थान सुरक्षित गर्नेछन्।

एमेच्योर खेलाडीको हकमा पनि कट बनाउन उत्कृष्ट २१ भित्र पर्नुपर्नेछ। विजेताले १ लाख, दोस्रो र तेस्रोले क्रमशः ६७ हजार र ४८ हजार हात पार्नेछन्। चौथोले ४० हजार र पाँचौंले ३६ हजार पाउनेछन्। कट बनाउने २१ प्रोफेसनल गल्फरले नगद पुरस्कार प्राप्त गर्नेछन्।

प्रकाशित: 22 फागुन 2080 08:10 मंगलबार