नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले मुलुकको अवस्थामा परिवर्तन भएन भन्ने कुरा सही नभएको बताएका छन्।
राष्ट्रिय प्रजातन्त्र पार्टीले अवस्था परिवर्तन नभएको भन्दै व्यवस्थाको विकल्प खोजिरहेका बेला उनले सो कुरामा कुनै सत्यता नरहेको प्रतिक्रिया दिएका हुन्।
मोतीदेवी स्मृति केन्द्रले शनिबार काठमाडौंमा आयोजना गरेको एक कार्यक्रममा बोल्दै अध्यक्ष ओलीले अहिले ४० प्रतिशतको हाराहारीमा महिला जनप्रतिनिधिहरू रहेको उल्लेख गर्दै विगतमा त्यस्तो थियो ? भनी प्रश्न समेत गरे।
‘अवस्था परिवर्तन भएन भन्ने हल्ला चल्ने गरेको छ। तर, अवस्थामा परिवर्तन आएको छ। अलि वर्ष अघिसम्म के थियो अवस्था ? अगाडि बढेको बहिनीहरु मन्त्री भइसक्नु भएको छ। माननीय भइसक्नु भएको छ।’ उनले भने।
३३ प्रतिशत महिलाहरु संसद् र सरकारी निकायमा प्रतिनिधित्व संविधानमै सुनिश्चित भएको दृष्टान्त पेश गर्दै अहिले विगतमा भन्दा तुलना नै गर्न नसक्ने गरी जनताको अवस्था राम्रो भएको उनले तर्क गरे। ओलीले जनताको अवस्थालाई पूर्ण रुपमा राम्रो बनाउने गरी काम गर्नुपर्ने जिम्मेवारी पनि आफूहरुको काँधमा रहेको सुनाए।
‘महिला सशक्तीकरणका लागि, जागरणका लागि, महिलाको हिस्सेदारीका लागि, महिला आरक्षणका लागि, सबै कुरामा हाम्रो पार्टी अग्र भागमा रहेको छ। त्यसअर्थ म फेरि पनि भन्न चाहन्छु–यो सामाजिक न्याय र समानताको आन्दोलनमा मेरो पार्टी नेकपा एमाले यो सदैव अग्रस्थानमा नै रहनेछ।’ उनले भने।
अध्यक्ष ओलीले महिलाहरुलाई सशक्तीकरणको बाटोबाट पुरुष सरह अधिकार दिलाउने कुरामा आफ्नो पार्टी लागिपर्ने समेत जिकिर गरे।
प्रकाशित: 26 फागुन 2080 15:53 शनिबार