कोशी प्रदेशका मुख्यमन्त्री केदार कार्कीले कोशी प्रदेश सरकारले मानवीय विकासलाई प्राथमिकतामा राखेको बताएका छन्।
शनिबार सुनसरीको देवानगञ्जमा नमो अनलाइन डटकमको उद्घाटन समारोहलाई सम्बोधन गर्दै प्रदेश सरकारले मानवीय विकासलाई प्राथमिकतामा राखेको बताएका हुन्।
मानिस शिक्षित र सिपयुक्त भए उनीहरूले स्वतः भौतिक विकास पनि गर्ने मुख्यमन्त्री कार्कीको धारणा छ।
उनले भने ‘मानिस शिक्षित, सिपयुक्त भए उसले स्वतः भौतिक विकास पनि गर्ने भएकाले सरकारको प्राथमिकता मानवीय विकासमा हुनेछ।’
मुख्यमन्त्री कार्कीले कोशी प्रदेशका १० वर्ष मुनिका बालबालिकालाई निःशुल्क उपचारको कार्यक्रम यसै आर्थिक वर्षदेखि सुरु गर्ने स्पष्ट पारे।
यस्तै हरेक पालिकाबाट दुई जना सामुदायिक विद्यालयमा अध्ययन गरेका विद्यार्थीलाई कृषि र भेटेरिनरी विषयमा उच्च शिक्षा अध्ययनका लागि छात्रवृत्ति उपलब्ध गराउने र यसरी प्रदेश सरकारको छात्रवृत्तिमा अध्ययन गरेकाहरूलाई रोजगारीसमेत उपलब्ध गराउने कार्कीले जानकारी दिए।
कृषि र भेटेरिनरीमा मात्रै हैन डाक्टर पढ्नलाई समेत प्रदेश सरकारले छात्रवृत्ति उपलब्ध गराउने बताए।
मुख्यमन्त्री कार्कीले कोशी प्रदेशमा सहमतिको सरकार गठनका लागि प्रयास जारी रहेको भन्दै आवश्यकताका आधारमा मन्त्रिपरिषद् बिस्तार हुने स्पष्ट पारे। उनले जनताको शिर ठाडो हुने गरी प्रदेश सरकारले काम गरेर देखाउने दाबी पनि गरे।
प्रकाशित: २३ मंसिर २०८० १९:०४ शनिबार