रौतहट । केही दिनयता चलेको सितलहरको कारण मधेश प्रदेशको रौतहट लगायतका जिल्लाहरुमा स्थानीयको जनजीवन प्रभाबित भएको छ ।

बिगत ४ दिनदेखि निरन्तर शितलहरको कारण खास गरी दलित तथा बिपन्न परिवारको जनजीवन प्रभाबित बनेको हो । यसपटक मधेशमा पुसको अन्तिम साताबाट शीतलहरको कहर सुरु भएको हो । बिहान र साँझ चिसो अत्यधिक छ । दिउँसो घाम नलाग्दा आर्थिक स्थिति कमजोर हुने तराईका मुसहर, डोम र विपन्न समुदायका लागि शीतलहर ‘कहर’ नै बनेको छ ।

विपन्न गरिब समुदायको सिरक डसना भनेकै पराल हो । चन्द्रपुर नगरपालिका वाड नं. ५ नहरटोलका ६० वर्षीय रामबाबु राम आफनो सिरक, डस्ना, कम्बल जे भने पनि पराल नै भएको बताए । उनले भने, ‘पराल ओछ्याएर सुते पनि माथि खरकै छानो भएकाले जबजब रात छिपिँदै जान्छ, शीत छानाबाट तप तप चुइँन थाल्छ, राम्रोसँग निदाउन सकिँदैन ।’

बढ्दो चिसोको कारण जीवनयापनमै समस्या भएको सोही गाउँकी एकल महिला सुमरिया देबीले बताइन । ‘घरमा ४ वटा छोराछोरी छन्, श्रीमान बिते, कमाउन जान चिसोले सकेको छैन’ उनले गुनासो गरिन । सोमरिया देबीको पनि चिसोमा पराल नै साहारा बनेको छ ।

शीतलहरले गरिबको दैनिकी प्रभावित गरेको छ । दैनिक कामगरी खाने मजदूर बिहान–बेलुका बाहिर निस्कन सकेका छैनन् । शीतलहरको प्रकोप बढ्न थाले पनि स्थानीय सरकारले गरीब तथा विपन्नलाई कसरी जाडोबाट बच्ने भन्ने न सूचना दिन सकेका छैनन ।

सो नहरटोलका अधिकांश नागरिकहरुको जाडो छल्ने उपाय भनेको पराल नै बनेको छ । दिउँसोभरि पराल बालेर ‘घुर’ ताप्ने र राति पनि परालको ओछ्यान र सिरक बनाएर ओडने गरेको अर्की स्थानीय रामकुमारी रामले बताइन् । सुनिता देबीको छाना पनि पलाष्टिकको र वरिपरी पनि पलाष्टिकले घेरिएको छ । दुइजना बुढाबुढी सोही घरमा सुत्ने गरेको उनले बताइन् । न्यानो सिरक र ओछयानको ब्यबस्था गरिदिन उनले माग गरिन ।

आफ्नो यस्तो दयनीय अवस्थामा पनि जनप्रतिनिधि नआउने गरेको उनीहरुको गुनासो छ । केही दिनयता शितलहर सुरु भएको भएता पनि यहा अहिलेसम्म वडाध्यक्ष, मेयर, बिधायक तथा संसद कोही पनि नआएको सोही गाउँकी जयकली देबीले बताइन । अहिले हामीलाई खानेकुरा नदिए पनि न्यानो कपडाको अति आवश्यक रहेको उनले बताइन ।

चिसोको कहरले सबै क्षेत्रलाई प्रभाव पारे पनि यहाँका गरिब दलित बस्तीको अवस्था नाजुक बनेको छ । चिसोले बालबालिका,बृद्धबृद्धाहरु नराम्रो संग प्रभाबित छन । चिसोलाइ मध्यनजर गदै चन्द्रपुर नगरपालिकाले नगरको बिभिन्न टोलमा दाउरा बाढने कार्यक्रम रहेको नगर प्रमुख संजय कुमार काफलेले जानकारी दिएका छन ।

यता केही दिनदेखी चिसो बढेको कारण आरडिसी नेपालले जिल्लाभर साडे नौ सय परिवारलाई कम्बल बितरण गर्ने भएको छ । बिहीबार राजपुर नगरपालिकामा साडे ६ सय परिवारलाइ २ वटाको दरले १३ सय वटा कम्बल बितरण गर्ने सो संस्थाका कार्यक्रम संयोजक धर्मेन्द्र साहले जानकारी दिएका छन ।

यस्तै केही दिनमै चन्द्रपुर नगरपालिकामा पनि ३ सय परिवारलाइ २ वटाको दरले ६ सय वटा कम्बल बितरण गर्ने कार्यक्रम रहेको कार्यक्रम संयोजक साहले बताए । बिपन्न,दलित तथा अपाङगता भएकाहरुलाइ न्यानो कपडा बितरण कार्यक्रम अन्र्तरगत यो कार्यक्रम ल्याएको साहले बताएका छन ।

यसैबिच अत्यधिक चिसो बढेपछि रौतहटका अधिकांश पालिकाहरुले सामुदायिक बिद्यालयहरु बन्द गरेका छन । सामुदायिक बिद्यालय बन्द गरेको भएता पनि निजी बिद्यालयहरु भने अझै बन्द भएका छैनन ।

(29 पटक भ्रमण गरिएको, आज 29 पटक भ्रमण गरिएको)