भोजपुर । भोजपुरको रामप्रसादराई गाउँपालिकाले डाग्बुङ (गुँरास) पदमार्ग निर्माण गरेको छ । प्राकृतिक रूपमा मनोरम क्षेत्र समेटेर डाग्बुङ (गुँरास) पदमार्ग निर्माण गरिएको हो ।
यो क्षेत्रमा रहेको नेपालको राष्ट्रिय फूल लालिगुँरासको संरक्षणसँगै आन्तरिक तथा बाह्य पर्यटक भित्रुयाउने लक्ष्यका साथ पदमार्ग निर्माण थालिएको गाउँपालिकाका प्रमुख प्रशासकीय अधिकृत सन्तोष पोखरेलले बताए । यसलाई मुख्य पर्यटन क्षेत्रको रूपमा स्थापित गराउने लक्ष्यको साथ निर्माण थालिएको उनको भनाइ छ । आन्तरिक तथा बाह्य पर्यटनको आवगमन बढाएर आर्थिक स्रोतका रूपमा जोड्न यहाँ पदमार्ग निर्माण गरिएको उनले बताए ।
‘गुँरासको संरक्षणसँगै यो क्षेत्रलाई पर्यटकीय गन्तव्यका रूपमा स्थापित गराउने उद्देश्यले पदमार्ग निर्माण गरिरहेका छौं,’ प्रमुख प्रशासकीय अधिकृत पोखरेलले भने, ‘यो प्राकृतिक रूपमा निकै सुन्दर क्षेत्र रहेकाले यसको विकासमा हामीले जोड दिएका छौं । यसलाई गाउँपालिकाको मुख्य पर्यटकीय गन्तव्य बनाउने हाम्रो लक्ष्य छ ।’
पदमार्ग निर्माणमा नेपाल जलवायु नमुना कार्यक्रमअन्तर्गत गत आर्थिक वर्षमा ३४ लाख खर्च गरिएको गाउँपालिकाले जनाएको छ । यस वर्ष पनि सोही कार्यक्रमको २० लाख बजेटबाट काम निरन्तर भइरहेको छ । यहाँ पर्यटन मन्त्रालयबाट १५ लाख बजेट प्राप्त भएको गाउँपालिकाको भनाइ छ ।
रामप्रसादराई गाउँपालिका–१ ओख्रेमा निर्माण भइरहेको यो स्थानलाई आधार बनाएर आन्तरिक पर्यटन सर्किट निर्माण गर्ने लक्ष्यका साथ काम भइरहेको गाउँपालिका अध्यक्ष थामबहादुर राईले बताए । हाल आख्रे बजारबाट करिब ६ किलोमिटर पदमार्ग निर्माण भएको अध्यक्ष राईले जानकारी दिए । निर्माण भइरहेको पदमार्गलाई वडा ४ मा रहेको धार्मिक तथा पर्यटकीय क्षेत्र चुलाचुलीसम्म जोड्ने योजना रहेको छ ।
‘हामीले अहिले डाग्बुङ पदमार्ग निर्माण गरिरहेका छौं,’ अध्यक्ष राईले भने, ‘यो स्थान प्राकृतिक हिसाबले निकै राम्रो सम्भावना बोकेको क्षेत्र हो । गाउँपालिकाभित्रका सबै पर्यटकीय क्षेत्रलाई समेटेर आन्तरिक पर्यटन सर्किट निर्माण गर्ने योजनाका साथ काम गरिरहेका छौं ।’
पर्यटकलाई लक्षित गरेर यहाँ करिब १ सय रोपनी क्षेत्रमा चिया खेती विस्तार थालिएको अध्यक्ष राईले बताए । यहाँ आउने पर्यटकलाई लक्षित गरेर घरबास (होमस्टे) निर्माण गरिने अध्यक्ष राईले जानकारी दिए । आउने पर्यटकलाई लक्षित गरेर आवश्यक संरचना निर्माणको काम पनि भइरहेको उनको भनाइ छ । यसलाई बृहत् मुन्दुम ट्रेलसँग जोड्ने लक्ष्य रहेको अध्यक्ष राईले बताए ।
‘लालीगुँरासको संरक्षणसँगै यो क्षेत्रको बृहत्तर पर्यटन विकासमा जुटेका छौं,’ अध्यक्ष राईले भने, ‘हाम्रो पालिकामा धेरै ऐतिहासिक, धार्मिक तथा पर्यटकीय क्षेत्र रहेका छन् । यी क्षेत्रलाई पर्यटनसँग जोडेर आर्थिक स्रोतका रूपमा विकास गर्ने योजना छ । यो डाग्बुङ पदमार्गलाई अन्तर्राष्ट्रिय क्षेत्रमा चिनाउने लक्ष्यका साथ काम गरिरहेका छौं ।’
लालिगुँराससँगैै फाटिला पहाडका चौरले पर्यटकको मन लोभ्याउने गरेको छ । यहाँ आउने पयर्टकले प्राकृतिक दृश्यको अवलोकन गर्दै आनन्द लिन सक्ने अध्यक्ष राईको भनाइ छ । यहाँबाट अग्ला हिमशृंलासँगै तराईका सुन्दर भू–भागको अवलोकन गर्न सकिन्छ ।
किराँत भाषामा डाग्बुङ अर्थात् गुँरास भनेर यो पदमार्गको नामकरण गरिएको हो । लालिगुँरास फुलेको समयमा यहाँ घुम्ने आउने पर्यटकको आवतजावत बढेको स्थानीयबासी गोविन्द भुजेलले बताए । यहाँबाट सगरमाथा, मकालु कञ्चनजंग लगायतका ठूला हिमशृंखलाको दृश्यवलोकन गर्न सकिने भुजेलको भनाइ छ । पदमार्ग निर्माणले यहाँ आन्तरिक तथा बाह्य पर्यटकको संख्या बढेकाले व्यापार व्यवसायसमेत बढ्दै गएको उनको भनाइ छ ।
‘डाग्बुङ पदमार्ग निर्माणले आन्तरिक तथा बाह्य पर्यटकको संख्या बढेको छ,’ उनले ‘स्थानीय परिकारको स्वाद लिँदै प्राकृतिक मनोरञ्जन लिन मासिन यहाँका आउने गरेका छन् ।’
(१३ पटक भ्रमण गरिएको, आज १३ पटक भ्रमण गरिएको)