पदयात्रामा गएकी एकजना जर्मन युवतीको भीरबाट खसेर मृत्यु भएको छ। कास्कीको माछापुच्छ्रे गाउँपालिका–१ मिर्सामा भीरबाट खसेकी २१ वर्षिया पीया जोसको ज्यान गएको हो।

कास्की प्रहरीका सूचना अधिकारी प्रहरी निरिक्षक सुर्य रानाका अनुसार पदयात्रामा रहेकी विदेशी पर्यटक मिर्साको भीरबाट लडेको भनेर स्थानीबाट प्रहरीले शनिबार बेलुकी जानकारी पाएको थियो। त्यसपछि खोजिमा खटिएको प्रहरीले शनिबार फेला पार्न सकेको थिएन। तर, आइतबार बिहान ८ बजे रुखमा अड्किएको अवस्थामा जोशलाई फेला पारेको रानाले बताए।

रानाका अनुसार उनलाई तत्काल पोखरास्थित क्षेत्रीय अस्पतालमा ल्याएकोमा चिकित्सकले मृत घोषणा गरेका थिए। प्रहरीका अनुसार ती युवतीसँगै पदयात्रामा गएका अर्का एकजना अमेरिकी युवकले आफ्नो केटी साथी भीरबाट खसेको जानकारी दिएका थिए। ती युवाले आफ्नो जर्मन साथी भीरबाट खसेको भनेर स्थानीयलाई जानकारी दिएका थिए।

ती युवालाई साथमा लिएर युवतीको खोजीमा प्रहरी जुटेको थियो। प्रहरीले मृतक युवतीका पुरुष साथीलाई निगरानीमा राखिरहेको पनि उनले बताए। माछापुच्छ्रे गाउँपालिका घुमेर फर्किने क्रममा ती युवती भीरबाट खसेको प्रहरीको भनाई छ।

प्रकाशित: आइतबार 13 फाल्गुन 2080 15:21