विशेष अदालतले ‘बेटी पढाऊ बेटी बचाऊ’ को नाममा मधेश प्रदेशमा अनियमितता भएको आंशिक ठहर गरेको छ।
मधेश प्रदेशका तत्कालीन सचिव यामप्रसाद भुसाललाई ८ लाख १० हजार रुपैयाँ जरिवाना र ३ महिना कैद ठहर गरेको हो। मुद्दामा दुई जनालाई दोषी ठहर गर्दै अन्य ७ जनालाई बिहीबार सफाइ दिएको छ।
विशेष अदालतका अध्यक्ष एवं न्यायाधीश टेकनारायण कुँवर, न्यायाधीशहरु तेजनारायण सिंह राई, मुरारीबाबु श्रेष्ठको इजलासले बेटी पढाऊ बेटी बचाउ अभियानमा साइकल किन्दा भ्रष्टाचार भएको आंशिक ठहर गरेको हो।
विशेष अदालतले तत्कालीन सचिव सहित खरिद विज्ञ भनिएका भगवान् झालाई ३ महिना कैद र १० हजार रुपैयाँ जरिवाना ठहर गरेको छ। झाविरुद्ध दुईवटा मुद्दा दर्ता भएका थिए। एउटा मुद्दामा दोषी ठहर भए भने अर्को मुद्दामा सफाइ पाएका छन्।
२०७९ साउन १८ मा अख्तियार दुरुपयोग अनुसन्धान आयोगले मधेश प्रदेशमा ‘बेटी पढाऊ बेटी बचाऊ’को नाममा अनियमितता भएको भन्दै १० करोड ३३ लाख रुपैयाँ मागदाबीसहित थप सजायमा प्रदेश सचिवसहित ६ जनाविरुद्ध र ४ जनाविरुद्ध छुट्टाछुट्टै भ्रष्टाचार मुद्दा दर्ता गरेको थियो।
प्रकाशित: ११ माघ २०८० २०:४४ बिहीबार