बुटवल उपमहानगरपालिका आर्थिक विकासमा देशभरमै सर्वोत्कृष्ट भएको छ। चालु आर्थिक वर्ष २०७९-८० मा देशभरका स्थानीय तहमध्ये बुटवल सर्वोत्कृष्ट भई म्युनिसिपल एक्सिलेन्स अवार्ड पाएको हो। नेपाल नगरपालिका संघले मंगलबार बुटवललाई सो अर्वाड प्रदान गरेको हो।
काठमाडौंमा आयोजित कार्यक्रममा संघीय मामिला तथा सामान्य प्रशासनमन्त्री भानुभक्त जोशीले बुटवल उपमहानगरका नगर प्रमुख खेलराज पाण्डेलाइ उत्कृष्ट नगरपालिका पुरस्कार प्रमाणपत्र प्रदान गरे।
प्रशासनविद् काशीराज दाहाल नेतृत्वको मुल्याङ्कन समितिले देशभरका नगरपालिकाले गरेका कार्यका पाँच क्षेत्रको अध्ययन गरी मुल्याङ्कन प्रतिवेदन तयार गरेको थियो, जसमा स्थानीय आर्थिक विकासतर्फ बुटवलले देशभरका सबै स्थानीय तहलाई उछिन्दै अवार्ड प्राप्त गर्न सफल भएको हो।
उत्कृष्ट नगरको अवार्ड प्राप्त गरेपछि नगर प्रमुख पाण्डेले सार्वजनिक सेवा सुविधा सुदृढ गर्दै आधुनिक प्रशासनलाई जनउत्तरदायी बनाउने अभियानमा लागेको बताए। ‘हामी सबै क्षेत्रलाई परिस्कृत गर्दै चौतर्फी विकास मार्गमा अघि बढेका छौं आर्थिक रचना र प्रणालीले नगरबासीको जीवनस्तरमा सुधार ल्याउने छ। त्यसले मानव संसाधनको विकासमा पनि भूमिका खेल्ने छ’, नगर प्रमुख पाण्डेले भने।
उत्कृष्ट नगरका रुपमा पुरस्कृत हुन पाउँदा आफूलाई काममा हौसला थपिएको भन्दै उनले नगरको विकासमा सहयोग गर्ने जनप्रतिनिधि, कर्मचारी, राजनीतक दल र सरोकारवाला सबैलाई धन्यवाद पनि दिए।
बुटवलको विकास र परिर्वतनको यात्रा सुरु भएको भन्दै उनले केही समयभित्रै त्यसको परिणाम नगरवासीले अनुभूत गर्ने बताए। बुटवललाई देशकै अगुवा सहरका रुपमा स्थापित गर्न पूर्वाधार, शिक्षा, स्वास्थ्य, प्रविधिको विकास, पर्यटन, रोजगार र्सिजनाका लागि उद्यमशीलतामा जोड दिइएको उनले बताए। नगरवासीलाई सुशासन र विकासको अनूभूति दिलाउनु आफुहरुको प्रमुख जिम्मेवारी रहेको उनले बताए।
प्रकाशित: 30 फाल्गुन 2080 09:42 बुधबार