काठमाडौं । सशस्त्र प्रहरी बल बाहिनीपति कपको उपाधि ४ नम्बर गण सुनसरी हेडक्वाटरले जितेको छ । प्रतियोगितामा ३ स्वर्ण, १ रजत पदक जित्दै सशस्त्र प्रहरी बल, नेपाल नं. ४ गण हेडक्वाटर सुनसरीले ‘बाहिनीपति कपको ट्रफी उचालेको हो । सशस्त्र प्रहरी बल, नेपाल नं. ३७ रिजर्भ गण हेड क्वाटर पकली, सुनसरी दोस्रो र सशस्त्र प्रहरी बल, नेपाल नं. ५ गण हेडक्वाटर त्रियुगा उदयपुरले तेस्रो स्थान हासिल गरेको छ ।
प्रतियोगितामा बाहिनी मातहत गण र गुल्महरुबाट विभिन्न ५ विधाका खेलहरुमा १२० जनाभन्दा बढी सशस्त्र प्रहरीका खेलाडीले प्रतिस्पर्धा गरेका थिए । ६ स्वर्ण, ६ रजत र २ कास्य गरी १४ वटा पदक वितरण गरिएको थियाे ।
फुटबल, भलिबल, एथ्लेटिक्स, ब्याडमिन्टन र टेबल टेनिस गरी ५ वटा विधाहरु समावेश गरिएको उक्त प्रतियोगिताको उद्घाटन तथा समापन बाहिनीका बाहिनीपति सशस्त्र प्रहरी नायव महानिरीक्षक अञ्जनीकुमार पोखरेलले गरेका हुन् । फुटबल, भलिबल, ब्याडमिन्टन एवम् टेबल टेनिस तर्फ ८–८ टिम र एथ्लेटिक्सतर्फ १६ जना (महिला र पुरुष) प्रतिस्पर्धीहरु सहभागी भएका थिए।
फुटबल, भलिबल र टेवलटेनिसतर्फ सशस्त्र प्रहरी बल, नेपाल नं. ४ गण हेडक्वाटर सुनसरी र ब्याडमिन्टनतर्फ सशस्त्र प्रहरी बल, नेपाल नं. ३७ रिजर्भ गण हेडक्वाटर पकली, सुनसरी प्रथम भएका छन् । एथ्लेटिक्स अन्तर्गत व्यक्तिगत स्पर्धामा पुरुषतर्फको १०० मिटर दौडमा सशस्त्र प्रहरी बल, नेपाल नं. ३७ रिजर्भ गण हेडक्वाटर पकली, सुनसरी र महिलातर्फ सशस्त्र प्रहरी बल, नेपाल नं. ३८ रिजर्भ गण हेडक्वाटर झापाले प्रथम स्थान हासिल गरेका छन्।
बिभिन्न खेलहरुमा सर्वोत्कृष्ट हुने खेलाडीहरुलाई ट्रफी, मेडल, प्रमाण–पत्र र खेलका निर्णायक एवम् टिमका व्यवस्थापकहरुलाई प्रसंशा–पत्र प्रदान गरिएको उक्त कार्यक्रममा बाहिनीपति सशस्त्र प्रहरी नायव महानिरीक्षक अञ्जनीकुमार पोखरेलले बाहिनीपति कपको ट्रफी सशस्त्र प्रहरी बल, नेपाल नं. ४ गण हेडक्वाटर सुनसरीका गणपति सशस्त्र प्रहरी उपरीक्षक समेनन्द बज्राचार्यलाई हस्तान्तरण गरे ।
संगठनको पेशागत गतिविधि चक्रअन्तर्गत बाहिनीपति कप प्रतियोगिता गत फागुन २२ गतेदेखि २५ गतेसम्म संचालन गरिएको थियो । प्रतियोगिता नं. १ बराह बाहिनी मुख्यालय पकली, सुनसरीले आयोजना गरेको हो ।
नायव महानिरीक्षक पोखरेलले खेलकुद प्रतियोगिताले सशस्त्र प्रहरी कर्मचारीहरुमा अझ अनुशासन र गतिशीलता ल्याउने, सम्भावना बोकेका नयाँ खेलाडीहरुको पहिचान गर्न सकिने, खेलकुदको माध्यमबाट राज्यलाई योगदान दिन सकिने, सशस्त्र प्रहरी कर्मचारीहरुमा आपसी बन्धुत्वको विकास भई कार्यक्षेत्रमा खटिन आत्मबलमा अभिबृद्धि हुने र निकट भविष्यमा आयोजना हुन गइरहेको ‘आईजीपी कप’ को लागि समेत खेलाडीहरुको छनौट गर्न सहयोग पुग्न बताए ।
(७८ पटक भ्रमण गरिएको, आज ७८ पटक भ्रमण गरिएको)