संसारभर बंगुरको मासु लोकप्रिय छ तर बंगुरपालन महँगोमध्येमा पर्छ। कारण, वर्षेनि रोगव्याधिका कारण बंगुरखेती सखाप हुने गर्छ। संसारभर रोगका कारण सखाप हुने यस्ता बंगुरको मूल्य २.७ खर्ब डलर पुग्ने गर्छ।
यतिबेला जेनस नामक बंगुरपालनमा सघाउने कम्पनीले रोगव्याधिबाट प्रायः मुक्त बंगुर उत्पादन गर्ने नयाँ विधि प्रयोगमा ल्याउँदैछ। आउँदो वर्षदेखि यसलाई पश्चिमा मुलुकहरूले प्रयोग गर्ने स्वीकृति दिइसकेका छन्।
बंगुरपालनका लागि जुन नयाँ प्रजाति बनाइँदैछ, तिनको रोग प्रतिरोधात्मक क्षमता अन्य स्थानीय जातका बंगुरभन्दा बढ्ता हुन्छ।
यसरी उत्पादित बंगुर जिन सम्पादन विधिबाट रोगमुक्त पारिएका हुन्छन्। क्रिस्पर भनिने यो जिन सम्पादन गर्ने विधि मानिसमा समेत प्रयोग गरिसकिएको छ। यही विधिबाट क्यान्सर लगायतका रोगको उपचार गरिँदै आएको पनि छ।
अब यस्तै प्रयोगबाट रोग प्रतिरोधात्मक क्षमता बढेका बंगुरको व्यापक पालन बढ्ने अपेक्षा गरिएको छ। रोग प्रतिरोधात्मक क्षमता कम भएका बेला यिनलाई एन्टिबायोटिक औषधी दिने गरिन्छ। तर एन्टिबायोटिकको अत्यधिक प्रयोगले मानिसको स्वास्थ्यमा समेत असर गरेको भन्दै त्योभन्दा प्रभावशाली प्रणाली जिन सम्पादन हुने भन्दै यसलाई प्रयोगका लागि अघि बढाइएको हो। हाललाई यो चार प्रजातिका बंगुरमा जिन सम्पादनको विधि प्रयोग गर्ने भएको छ।
त्यसो त यस्तो प्रयोग गर्न कम्पनीहरू तयार भएका भए पनि मासुजस्तो ठूलो समूहले खपत गर्ने खाद्यवस्तुमा स्वास्थ्यलाई हानि पुर्याउनेबारे धेरैलाई चासो थियो। त्यसैले यस कार्यका लागि स्वीकृति दिन ढिलाइ भइरहेको थियो। कम्तीमा हाललाई जिनस नामक कम्पनीले ती सारा बाधा पार गरेको न्यु साइन्टिस्ट पत्रिकाले जनाएको छ।
अबका केही वर्षमा जिन सम्पादित बंगुर पालन बढ्ने र संसारभर व्यापक खपत बढ्न भने केही समय लाग्न सक्ने वैज्ञानिकहरूको मत छ। यसका पक्षधरहरू जिन सम्पादित बंगुरहरूमा रोग लागिहाले पनि त्यसको पीडा कम महसुस गर्नेसमेत बताएका छन्। हाल बंगुरपालन र बंगुरको मासुका लागि जनावरहरूलाई अत्यधिक यातना दिई मारिने गरिएको छ।
अच्युत कोइरालाले प्रस्तुत गरेका थिए
प्रकाशित: 22 फागुन 2080 12:12 मंगलबार