काठमाडौं । पहिले सुन्दर परिकल्पना बन्छ, त्यसपछि पटकथामा उतारिन्छ । लगभग पाँच मिनेटको गीतमा एउटा सम्पूर्ण कथा समेट्नुपर्ने हुनाले ‘फ्रेम’ सकेसम्म सटिक बनाउनुपर्ने बाध्यता हुन्छ ।
अग्रज अभिनेता पवन जोशीले यस्तै ‘फ्रेम’भित्र एउटा प्रेमिल म्युजिक भिडियो कैद गरेका छन् । अभिनय यात्राको झन्डै तीन दशक लामो अनुभव उनले ‘खुसी मागेको थिएँ तिमी भेटियौ…’ बोलको गीतमा प्रयोग गरेका हुन् ।
दाजुभाउजुको अपहेलनामा परेकी टुहुरी बहिनीको जीवनमा आएको ‘टर्निङ प्वाइन्ट’लाई निर्देशक जोशीले सर्लक्क बुनेका छन् । मूलधारका नेपाली चलिचत्रमा खारिएका एउटा कलाकारको निर्देशकीय क्षमता भिडियोमा देख्न सकिन्छ ।
यसमा दुई मत छैन, भिडियोको सबल पक्ष गीत नै हो । तर, अहिलेका अधिकांश म्युजिक भिडियोमा गीतभन्दा दृश्यलाई बढी महत्व दिइएको पाइन्छ । ‘गीत जस्तोसुकै भए पनि भिडियो राम्रो बनाउनुपर्छ’ भन्ने मान्यता व्याप्त देखिन्छ । निर्देशक जोशीले त्यो परिपाटी चिर्ने प्रयास गरेका छन् ।
‘कमी कमजोरी अवश्य पनि छन्, तर प्रयास गरेको छु,’ जोशी भन्छन्, ‘कला क्षेत्रमा लामो समयदेखि छु, त्यसैलाई सदुपयोग गर्ने प्रयासमा छु ।’ पछिल्लो समय अभिनयभन्दा प्रोडक्सनतिर बढी केन्द्रित जोशी नेपाल भाषाका म्युजिक भिडियो निर्देशनमा पनि उत्तिकै सक्रिय छन् ।
‘खुसी मागेको थिएँ तिमी भेटियौ…’ गीतकी मुख्य पात्र हुन्, आराध्या लक्ष्मी खड्गी । टुहुरी बहिनीको भूमिका उनैले निर्वाह गरेकी छन् । नेपाल भाषाको अन्तर्राष्ट्रिय पुरस्कार विजेता ‘इन्द्रायणी’की नायिका आराध्याको परिवेशअनुकुल नृत्य र अभिनय सान्दर्भिक लाग्छ ।
‘गीतको एउटा दृश्यांकन क्रममा मेरो आँसु नै झ¥यो, त्यो अभिनय थिएन, साँच्चै रोएकी थिएँ,’ ललितपुर सिकालीको छायांकनका दिन सम्झिँदै आराध्याले भनिन्, ‘कथा मनभित्र गढ्यो भने सा“च्चिकै आ“सु झर्छ, ग्लिसिरिन लगाइरहनै पर्दैन ।’
‘माया मिष्ट्री’ उपन्यासका लेखक मोहन के. श्रेष्ठकृत ‘खुसी मागेको थिएँ…’ शब्दमा दीपा महर्जनले आवाज दिएकी छन् । ‘फिल्मी फ्लेवर’ बोकेको गीत अनिल तुलाधरले संगीत तथा संगीत संयोजन गरेका हुन् । प्रेमिल शब्द–संगीतमा गायिका महर्जनले सक्दो न्याय गरेकी छन् ।
हालै एक समारोहबीच सार्वजनिक म्युजिक भिडियोमा आराध्याका अतिरिक्त सन्देश श्रेष्ठ, सुरेन्द्र श्रेष्ठ, सरु भारती र निर्मल रञ्जितले अभिनय गरेका छन् । त्यस्तै, सनमकुमार श्रेष्ठको शृंगारले चमक ल्याएको छ भने छायांकन, सम्पादन र कलरिङमा सोहन मानन्धरको दक्षता झल्किन्छ ।
(५१ पटक भ्रमण गरिएको, आज ५१ पटक भ्रमण गरिएको)