काठमाडौं । बाग्मती ‘प्रादेशिक ललितकला प्रदर्शनी २०८०’ सोमबारबाट नाफामा सुरु भएको छ । प्रदर्शनीको संस्कृति, पर्यटन तथा नागरिक उड्डयनमन्त्री हितबहादुर तामाङले उद्घाटन गरेका छन् ।
प्रदर्शनीमा समसामयिक चित्रकला–मूर्तिकला, परम्परागत चित्रकला––मूर्तिकला, लोककला, हस्तकला, वास्तुकला तथा अन्य सिर्जनात्मक (बहुआयामिक) कलालगायतका विविध विधाअन्तर्गतका २ सय १० कलाकारका २ सय ४१ भन्दा बढी कलाकृति राखिएको छ । प्रदर्शनी चैत १६ गतेसम्म चल्नेछ ।
नेपाली ललितकलाको क्षेत्रमा निरन्तर साधनारत रही ललितकला क्षेत्रको संवर्धन एवं प्रवर्धनमा उल्लेखनीय योगदान पु¥याएको भनी उद्घाटन समारोहमा अग्रज कलाकारहरू बाबुराज द्यःला, गौतमरत्न तुलाधर, चन्दा श्रेष्ठ, मिरा भट्टराई, साइला लामा ‘मंगल’, पूर्णप्रसाद ह्योजू, पुष्पाञ्जली शेरचनलाई सम्मान गरियो ।
प्रदर्शनी उद्घाटन कार्यक्रममा बोल्दै संस्कृति, पर्यटन तथा नागरिक उड्डयनमन्त्री हितबहादुर तामाङले यस कार्यक्रममार्फत बाग्मती प्रदेशका कलालाई नजिकबाट चिन्ने अवसर पाएको बताए । उनले बाग्मती प्रदेश कला, संस्कृतिसँगै भौगोलिक रूपमा पनि विविधतायुक्त भएको बताउँदै यसको संरक्षण तथा प्रवर्धनमा यस्ता प्रदर्शनीले महत्वपूर्ण भूमिका खेल्ने भनाइ राखे ।
कार्यक्रममा बोल्दै प्रतिष्ठानका कुलपति नारदमणि हार्तम्छालीले छायामा परेका कलालाई प्राथमिकता दिनुपर्ने बताए । उनले कलाको विकास, प्रवर्धन ललितकलाको ठूलो भूमिका भएको जिकिर गर्दै प्रदेशमा तथा पालिकामा रहेका प्रतिष्ठानसँगको सहकार्यमा काम भइरहेको जानकारी दिए ।
प्रतिष्ठानका उपकुलपति एवं बाग्मती प्रदेश समन्वय समिति संयोजक लालकाजी लामाले प्रदर्शनीमा युवा पुस्ताको सहभागिता उत्साहजनक भएको बताए । उनले ललितकलाको क्षेत्रमा यो प्रदर्शनीले नयाँ बाटो कोर्ने धारणा व्यक्त गरे । नेपाली ललितकला क्षेत्रलाई स्थानीयस्तरबाटै समृद्ध बनाउँदै यसलाई व्यवसायसँग जोड्नुपर्ने भनाइ राखे, ‘हाम्रो आवश्यकता हामीले नै बोल्नुपर्छ ।’
सो प्रतिष्ठानका सदस्य सचिव देवेन्द्रकुमार काफ्ले ‘थुम्केली’ले नेपालको संविधान २०७२ अनुरूप रही प्रतिष्ठानले पहिलोपटक सातै प्रदेशमा ‘प्रादेशिक ललितकला प्रदर्शनी’ गर्ने सिलसिलामा ६ वटा प्रदेशमा प्रदर्शनी गरिसकेर बाग्मती प्रदेशमा प्रदर्शनी सुरु गरेको जानकारी गराए । उनले प्रतिष्ठानले गरेको यो अभ्यासले प्रदेशको मौलिक, रैथाने कलालाई संरक्षण तथा प्रवर्धन गर्न थप सहयोग पुगेको जानकारी दिए ।
(१५ पटक भ्रमण गरिएको, आज १५ पटक भ्रमण गरिएको)