काँडाघारीस्थित अक्षरा स्कुलको खेल मैदानमा भएको ‘प्रथम अक्षरा अन्तर विद्यालय बास्केटबल प्रतियोगिता’ सम्पन्न भएको छ।
माघ १६ गतेदेखि सुरु बास्केटबलमा उपत्यकास्थित काठमाडौं, भक्तपुर र ललितपुरका विभिन्न विद्यालयका सिनियर ब्वाइजतर्फ १६, सिनियर गल्र्सतर्फ १६ र मिक्स जुनियरतर्फ १२ वटा समूह सहभागी भएका थिए।
बिहीबार सम्पन्न प्रतियोगितामा तीनवटै विधामा भ्याली पब्लिक स्कुलले बाजी मारेको छ। भ्यालीले सिनियर ब्वाइज, सिनियर गल्र्स र मिक्स जुनियर तीनवटै विधामा बाजी मारेको हो।
सिनियर ब्वाइजतर्फ अक्षरिका स्कुल र भ्याली पब्लिकको भिडन्त भएको थियो। जसमा भ्यालीले ६५ स्कोर जोड्दै अक्षरिकालाई ६४ स्कोरमा समेटेको थियो। त्यस्तै गेटवे स्कुल तेस्रो स्थान ओगट्न सफल भयो। सिनियर ब्वाइजमा भ्यालीका सुनिल पौडेल सर्वाधिक ३६ स्कोर जोड्दै म्यान अफ द म्याचको उपाधि उचाल्न सफल भए।
त्यस्तै सिनियर गल्र्समा पनि भ्यालीले नै बाजी मारेको छ। नेमोनिक स्कुलसँग भिडेको भ्यालीले १५ का विरुद्ध ५० स्कोर गर्यो। भ्याली पब्लिककी एन्जल गुप्ता सर्वाधिक १० स्कोर गर्दै म्यान अफ द म्याच घोषित भइन्। सिनियर गल्र्समा बौद्ध इन्टरनेसनल तेस्रो स्थान ओगट्न सफल भयो।
फाइनल खेलमा जुनियर मिक्सतर्फ आलोक स्कुल र भ्यालीबीच प्रतिस्पर्धा भएको थियो। जसमा भ्यालीले आलोकलाई ३८–१० ले पछि पार्दै बाजी मारेको थियो। भ्यालीका विशाल परियार सर्वाधिक २० स्कोर जोड्दै म्यान अफ द म्याच घोषित भए। जुनियर मिक्समा विद्या विकास स्कुलले तेस्रो उपाधि हासिल गर्न सफल भयो।
प्रतियोगितामा सबैभन्दा मूल्यवान् खेलाडी घोषणा गरिएको थियो। जसमा सिनियर ब्वाइजतर्फ भ्यालीका सुनिल पौडेल, सिनियर गल्र्सतर्फ भ्यालीकै अनिता गुरुङ, जुनियर मिक्सतर्फ भ्यालीकै विशाल परियारलाई सो विधामा ट्रफी वितरण गरिएको थियो। त्यस्तै सिनियर ब्वाइजमा सर्वाधिक स्कोर गर्नेमा अक्षरिकाका आर्यन श्रेष्ठ, सिनियर गल्र्समा नेमोनिककी शान्ति तामाङ र आलोक स्कुलका सार्थक सिग्देल रहेका थिए।
त्यस्तै उदीयमान खेलाडी विधातर्फ सिनियर ब्वाइजमा गेटवेका सन्दीप सिवाकोटी, सिनियर गल्र्समा बौद्ध इन्टरनेसनल स्कुलकी डोमा शेर्पा र जुनियर मिक्समा अक्षरा स्कुलका रुविन महत घोषित भएका थिए।
प्याब्सन केन्द्रीय कमिटी उपाध्यक्ष कृष्ण अधिकारीको प्रमुख आतिथ्य र डा. राजु अधिकारीको विशेष आतिथ्यमा बिहीबारै पुरस्कार वितरण गरिएको थियो।
विद्यालयकी संस्थापक निर्देशक अन्जु भट्टराई, शैक्षिक निर्देशक विष्णु पनेरु, प्रधानाध्यापक मिलन केसी लोप्चन, खेल शिक्षक किरण कटुवाललगायतले प्रथम, द्वितीय र तृतीय हुने टिमलाई मेडल, ट्रफी र प्रमाणपत्रका साथै अन्य विभिन्न विधामा सर्वोत्कृष्टलाई मेडल र प्रमाणपत्रद्वारा सम्मान गरिएको गरेका थिए।
प्रकाशित: २५ माघ २०८० २१:५२ बिहीबार