पोखरा । पचासको दशकमा नेपालका विभिन्न भागमा थुप्रै कन्सर्ट गरेको कन्दरा ब्याण्डले गृहनगर पोखरामा अहिलेसम्मकै ठूलो कन्सर्ट गरेको छ । शुक्रबार राति नयाँबजारस्थित प्रदर्शनी केन्द्रमा लिड भोकलिष्ट विवेक श्रेष्ठलगायतले करिब साढे ३ घण्टासम्म करिब १० हजार दर्शकलाई लोक पप प्याटर्नका गीतमा लगातार झुमाइरहे ।
कर्णप्रिय स्वरसँगै करिब २० वर्षपछि चर्चित ब्याण्ड कन्दराले गहकिलो सांगीतिक प्रस्तुति दिएको हो ।
‘पहिला घरदेश अनि परदेश’ सन्देशसहितको कन्सर्टमा भोकलिष्ट विवेकले चलेका र नयाँ गरी करिब २ दर्जन गीत गाए । दर्शकलाई भरपूर मनोरञ्जन दिँदै उनले ‘तगारोमा रुमाल राखी,’ जिन्दगी उत्सव हो’, ‘हङकङ पोखरा’, ‘चञ्चले कान्छी,’ ‘लेककी हे माया,’ ‘तिमी पारि,’ ‘विदेशीएर गइन् उनी’ ‘विचरा म’ लगायत गीत सुनाए । यस्तै, सुनिल थापा, हरि महर्जन, देव लामा, सुन्दर महर्जन, पंकज झाको समूहले २० भन्दा बढी गीत संगीत लाइभ प्रस्तुति दिए ।
पोखराको आन्तरिक तथा वाह्य पर्यटन प्रवद्र्धन गर्ने उद्देश्यले आयोजित कन्सर्ट भव्य भएको आयोजक पोखरा पर्यटन परिषद् अध्यक्ष पोमनायण श्रेष्ठको दाबी छ । पर्यटन उद्यमसँग सम्बद्ध १४ संस्थाको आबद्धता रहेको छाता संगठन परिषद् आयोजक र लायन्स क्लब अफ पोखरा सामीप्य सहआयोजक रहेको कन्सर्टको शुभारम्भ पोखरादेखि सुरु भएको हो । यस्तोखालका कन्सर्ट देशका सातै प्रदेश र मुख्य सहरमा पुग्नेछ ।
पर्यटन उद्यमको पुनर्जागरण गरी पर्यटकीय गन्तव्यस्थलको सन्देश दिने, पर्यटन प्रवद्र्धनमा टेवा पु¥याउने, घुमफिर संस्कृति एवं दिगो पर्यटनलाई प्रोत्साहित गर्ने गरी अर्थतन्त्र चलायमान र गतिशील बनाउने एवं गीतसंगीतको जगेर्ना गर्ने उद्देश्यले ‘कन्दरा सांगीतिक अभियान–२०८०’ गरिएको आयोजकले जनाएको छ ।
कन्दराले अहिलेसम्म ६ एल्बम र सयौं गीतसंगीत बजारलाई दिइसकेको छ । मुलुकभित्र र बाहिर गरी २ सयभन्दा बढी कन्सर्ट गरिसकेको छ । अभियानको ठूलो कन्सर्ट पोखरामा भएको आयोजकको दाबी छ ।
गण्डकी प्रदेश उद्योग, पर्यटन, वन तथा वातावरण मन्त्रालय, पोखरा महानगरपालिका, नेपाल पर्यटन बोर्ड, गण्डकी प्रज्ञा प्रतिष्ठानले सांगीतिक अभियानको प्रवद्र्धनमा हातेमालो गरेका छन् । व्यवस्थापक अल्फा स्क्वायरले प्रदर्शनी केन्द्रमा पहिलो पटक सबैभन्दा ठूलो साइजको स्टेज बनाएको थियो । स्टेज, साउण्ड सिस्टम र लाइटका लागि आइएसएस काठमाडौंले संयोजन गरेको थियो ।
(25 पटक भ्रमण गरिएको, आज 25 पटक भ्रमण गरिएको)