पोखरा । पृथ्वीनारायण क्याम्पस, पोखरामा विभागीय प्रमुख नियुक्ति विवादमा परेको छ । विज्ञान संकायअन्तर्गत वनस्पतिशास्त्र विषयको विभागमा ज्येष्ठताक्रम प्रक्रिया छोडेर कनिष्ठलाई नियुक्ति दिइएको पाइएको हो ।

उपप्राध्यापक डा. होमनाथ पाठकलाई क्याम्पस प्रमुख प्राडा सरोज कोइरालाले हालै विभागीय प्रमुख नियुक्त गरेका हुन् । जब कि पाठकभन्दा आफू सिनियर रहेको अर्का उपप्राध्यापक कल्याण पन्तको दाबी छ ।

त्रिवि संगठन तथा शैक्षिक प्रशासनसम्बन्धी नियम २०५० बमोजिम ज्येष्ठताका आधारमा विभागीय प्रमुख नियुक्तिको व्यवस्था छ । क्याम्पस प्रमुखले पाठकलाई दिएको नियुक्तिपत्रमा भनिएको छ, ‘…. वनस्पतिशास्त्र विषयको विभागको विभागीय प्रमुख पदमा त्रिवि संगठन तथा शैक्षिक प्रशासनसम्बन्धी नियम २०५० को परिच्छेद ४ को दफा १९ बमोजिम मिति २०८० मंसिर १० देखि लागु हुने गरी तपाईंलाई नियुक्ति गरिएको छ ।’ जब कि सोही दफाको उपनियम (२)(१) बमोजिमको विभागको अध्यक्षमा आंगिक क्याम्पस वा विभागका विषयसम्बन्धी सम्भवतः वरिष्ठ शिक्षकहरुमध्येबाट एक जनालाई अध्यक्षमा र सम्बन्धित विषय पढाउने सबै शिक्षकहरु सदस्य हुनेछन्,’ उल्लेख छ ।

पन्त र पाठकको शिक्षण सहायक र उपप्राध्यापकको नियुक्ति एकै मितिको भए पनि कोर्स करार र पार्टटाइम नियुक्तिमा पन्त अगाडि देखिन्छन् । कनिष्ठलाई विभागीय प्रमुख नियुक्त गरेका प्राडा कोइराला यो कुरा भने मान्न तयार छैनन् । उनले भने, ‘फाइल हेर्दा उहाँहरु (पाठक र पन्त) दुवैको एकै दिनको करार र स्थायीको नियुक्ति रहेछ । तीमध्ये एक जना पिएचडी गरेको हुनुहुँदोरहेछ, मैले विवेक पु¥याएर नियुक्ति गरेको हुँ ।’ उनी अगाडि भन्छन्, ‘मैले कुनै वैरभाव, जालझेल गरेको छैन । कुनै राजनीति छैन ।’ कोर्स करार र पार्टटाइमलाई बेवास्ता गरिएको पन्तको गुनासो छ । उनी भन्छन्, ‘त्रिवि संगठन तथा शैक्षिक प्रशासनसम्बन्धी नियमविपरीत वनस्पतिशास्त्र विभागमा ज्येष्ठताक्रम प्रक्रिया छोडेर विभागीय प्रमुख नियुक्ति गरिएको छ । यसबाट आफू अपमानित भएको महसुस गरेको छु ।’

२०५५ मंसिर १ मै आफू पार्टटाइम नियुक्ति भएको पन्त बताउँछन् । पाठकको अर्को वर्ष २०५६ असोज २ मात्र मात्र नियुक्ति छ । दुवैलाई २०६० साउन १ मा कोर्स करारमा नियुक्ति दिइएकोमा पाठकको क्रमभंग छ । उनले अर्को वर्षको साउन १ मा आंशिक शिक्षकको नियुक्ति बुझेर फेरि २०६२ असार १७ मा कोर्स करार लिएका हुन् । बागलुङका पाठक र लमजुङका पन्त दुवै एकै मितिमा २०६४ साउन १ मा शिक्षण सहायक बनेका हुन् ।

‘पिएचडी’ भएकोले नियुुक्त गरेको भन्ने प्राडा कोइरालाको दाबीबीच पन्त तर्क गर्छन्, ‘योग्यता (पिएचडी) आधारमा ज्येष्ठताक्रम कायम गरिएको हो भने नपढेका बाउभन्दा पढेको छोरो सधैं जेठो हुन्छ ।’ त्रिवि संगठन तथा शैक्षिक प्रशासन सम्बन्धी नियम २०५० मा कहीँ कतै ज्येष्ठताको आधार शैक्षिक योग्यतालाई लिएको छैन । क्याम्पसकै एक कर्मचारी भन्छन्, ‘विभागीय प्रमुख पन्त हुनुपर्नेमा दुईमतै छैन । होमनाथजी पन्तभन्दा जुनियर हो । नियुक्तिमा तलमाथि भएकै हो ।’

पृथ्वीनारायण क्याम्पस प्राध्यापक संघका सभापति सहप्राध्यापक लक्ष्मीशरण अधिकारीले विभागीय प्रमुख ज्येष्ठताको आधारमा नियुक्ति हुनुपर्नेमा दुईमत नहुने बताए । उनले भने, ‘सँगै स्थायी छ भने पनि त्यसअघि करारको थियो होला, सँगै करार छ भने पनि त्योभन्दा पहिला पार्ट टाइमको थियो । पार्टटाइम पनि सँगै भएको रहेछ भने पनि उमेरको ज्येष्ठताका आधारमा विभागीय प्रमुख नियुक्ति गर्नुपर्छ ।

त्यसअघि, गएको वैशाखमा पनि क्याम्पसकै स्वास्थ्य, शारीरिक तथा जनसंख्या शिक्षा विभागमा २०७४ जेठमा उपप्राध्यापक नियुक्त सुदेश पण्डितको सट्टा २०७४ असारमा उपप्राध्यापक नियुक्त भएका अर्का दुर्गाप्रसाद पौडेललाई विभागीय प्रमुख सुम्पिएको थियो । आफू ज्येष्ठता आधारमा अघि रहेको पण्डित बताउँछन् ।

त्रिविमा रोलक्रम मिचेर जुनियरलाई भटाभट विभागीय प्रमुख नियुक्तिका घटना दोहोरिएपछि केही समयअघि राष्ट्रिय सतर्कता केन्द्रमा उजुरी समेत परेको थियो । केन्द्रले त्यस्ता नियुक्त प्राध्यापकलाई तुरुन्त नियुक्ति बदर गरी सिनियर प्राध्यापकलाई नियुक्ति दिनू भनी त्रिवि रजिष्ट्रार कार्यालयलाई गरेको पत्रानुसार धेरै क्याम्पसमा नियुक्ति बदर भएको उदाहरण रहेको सानोठिमी क्याम्पसका पूर्व सहायक क्याम्पस प्रमुख दीनानाथ पण्डित बताउँछन् । उनका अनुसार देशका विभिन्न क्याम्पसमा नियुक्तिमा यस्ता अनियमितता गरिएको देखिएकोले उक्त नजीर आकर्षित हुने गरेको छ ।

(25 पटक भ्रमण गरिएको, आज 25 पटक भ्रमण गरिएको)