कर्णाली प्रदेश खेलकुद विकास परिषद्ले खेलकुदको क्षेत्रमा उत्कृष्ट योगदान पुर्याउने कर्णालीका दश स्थानीय तहका प्रमुखहरुलाई भलिबलको माला लगाएर सम्मान गरेको छ।
सोमबारदेखि सुरु भएको प्रदेशस्तरीय राष्ट्रपति रनिङशिल्ड प्रतियोगिताको उद्घाटन कार्यक्रममा दश जिल्लाका दश स्थानीय तह प्रमुखलाई दश भलिबलको माला लगाएर सम्मान गरिएको हो।
१० वटै पालिका प्रमुखहरुलाई मुख्यमन्त्री राजकुमार शर्माले सम्मान गरेका थिए। परिषद्का सदस्य–सचिव विश्वामित्र संज्यालका अनुसार दैलेखको ठाँटीकाँध गाउँपालिका, सुर्खेतको चौकुने गाउँपालिका, रुकुम पश्चिमको सानीभेरी नगरपालिका, जुम्लाको तातापानी गाउँपालिका, कालिकोटको तिलागुफा नगरपालिका, जाजरकोटको छेडागाड नगरपालिका, हुम्लाको खार्पुनाथ गाउँपालिका, डोल्पाको त्रिपुरासुन्दरी नगरपालिका, मुगुको सोरु गाउँपालिका र सल्यानको कपुरकोट गाउँपालिकालाई सम्मान गरिएको हो।
‘जिल्ला खेलकुद विकास समितिको सिफारिसका आधारमा खेलकुदका क्षेत्रमा महत्त्वपूर्ण योगदान पुर्याउने पालिकालाई सम्मान गरिएको हो,’ उनले भने, ‘यस्ता कार्यले आगामी दिनहरुमा अरु पालिकाहरुलाई पनि प्रेरणा मिल्ने अपेक्षा हामीले लिएका छौं।’
१४ औं राष्ट्रपति रनिङ शिल्ड सुरु
प्रदेश राजधानी वीरेन्द्रनगरमा सोमबारदेखि १४ औं राष्ट्रपति रनिङ शिल्ड छनोट प्रतियोगिता सुरु भएको छ। प्रदेश खेलकुद विकास परिषद्को आयोजनामा भएको प्रतियोगिता तीन दिनसम्म चल्नेछ।
प्रतियोगिताको उद्घाटन गर्दै कर्णाली प्रदेशका मुख्यमन्त्री शर्माले १० औं राष्ट्रिय खेलकुद आयोजना गर्ने अवसर कर्णालीले प्राप्त गरेको बताउँदै सोही अनुसार खेल क्षेत्रको विकासमा प्रदेश सरकार क्रियाशील रहेको बताए। उनले खेल पूर्वाधार निर्माण र खेलाडी उत्पादन आफूहरुको लक्ष्य रहेको सुनाए।
पूर्वमन्त्री एवम् नेकपा एमालेका नेता यामलाल कँडेलले कर्णालीलाई चिनाउन खेलाडीहरुको महत्त्वपूर्ण भूमिका रहेको बताए।
उनले कर्णालीले अब १० औं राष्ट्रिय खेलकुद प्रतियोगिता आयोजना गर्ने मात्रै नभएर पदक तालिकामा पनि पहिलो हुने गरेर अहिले देखिनै तयारीमा लाग्नुपर्नेमा जाेड दिए।
प्रकाशित: ७ फाल्गुन २०८० २०:२६ सोमबार