त्रिभुवन विश्वविद्यालय र सवारी साधन सम्बन्धी पठाओ कम्पनीबिच स्नातक तहका विद्यार्थीहरूलाई छात्रवृत्ति प्रदान गर्ने सहमति पत्रमा हस्ताक्षर भएको छ।
त्रिभुवन विश्वविद्यालयका ६२ वटा आङ्गिक क्याम्पसमा अध्ययनरत गरिब, जेहेन्दार विद्यार्थीहरुको उच्च शिक्षा सहयोग गर्ने उद्देश्यले पठाओ कम्पनीले वार्षिक १५ लाख रुपैयाँ छात्रवृत्ति दिने गरी सहमति भएको हो।
पठाओले त्रिविलाई उपलब्ध गराउने भएको त्रिविको विद्यार्थी कल्याण तथा खेलकुद निर्देशनालयका निर्देशक पशुपति अधिकारीले बताए। ‘छात्रवृत्तिका लागि मानविकी तथा सामाजिक शास्त्र सङ्काय, व्यवस्थापन सङ्काय र शिक्षा शास्त्र सङ्कायमा अध्ययनरत विद्यार्थीहरूलाई समेटिने विषय द्धिपक्षिय सहमति भएको हो’, निर्देशक अधिकारीले नागरिकसँग भने, ‘पठाओले सामाजिक उत्तरदायित्व अन्तर्गत दुर्गमका विद्यार्थीलाई उच्च शिक्षामा छात्रवृत्तिको लागि वर्षेनी १५ लाख छुटाएको हो।’ यसबाट दुर्गमका एक सय विद्यार्थीले वर्षेनी लाभ पाउनेछन्। प्रतिविद्यार्थी वार्षिक १५ हजार रकम पाउने सहमति भएको उनले जनाए।
त्रिभुवन विश्वविद्यालयका तर्फबाट विद्यार्थी कल्याण तथा खेलकुद निर्देशनालयका निर्देशक प्राध्यापक पशुपति अधिकारी र पठाओ कम्पनीको तर्फबाट सिनियर म्यानेजर सुरक्षा हमालले सहमति पत्रमा हस्ताक्षर गरेका हुन्। छात्रवृत्ति चालु शैक्षिक सत्रमा भर्ना हुने विद्यार्थीले पाउने हो।
‘अब त्रिविले भर्नासँगै विद्यार्थीलाई छात्रवृत्तिको लागि छनौट गर्ने मापदण्डको आधार बनाएर अघि बढ्ने तयारी गरेको बताइएको छ। अधिकारीले भने ‘दुर्गम, दलित, मधेसी, जनजातिलगायतका उच्च शिक्षामा पहुँच नपुगेका विद्यार्थीलाई मुख्य रुपमा समेट्ने छात्रवृत्तिको मूल लक्ष्य हो।’
प्रकाशित: १२ पुस २०८० १७:१२ बिहीबार