लगानी
नेप्से विश्लेषण
अभियान संवाददाता
काठमाडौं । आइतवार नेप्से परिसूचक ६ प्रतिशतले बढेपछि आजलाई शेयर कारोबार बन्द भएको छ । आज बजार खुलेदेखि नै शेयर बजार लगातार बढ्न थालेको थियो भने डेढ घण्टा नबित्दै ६ प्रतिशतले बढेपछि कारोबार बन्द भएको हो ।
आइतबारको प्रि-ओपन सेसनमा नै १३ अंकले बढेको नेप्से कारोबार खुलेको ५ मिनेटमा नै पहिलो सर्किट लागेको थियो । अर्थात् कारोबार खुलेको ५ मिनेटमा नेप्से ४ प्रतिशतले बढेको थियो ।
त्यसपछि २० मिनेट कारोबार रोकिएर खुलेको २ मिनेटमा नै नेप्से ५ प्रतिशतले बढेको छ । नेप्से ५ प्रतिशतले बढेसँगै ११ बजेर २७ मिनेटमा दोस्रो सर्किट लाग्यो । दोस्रो सर्किटपछि ४० मिनेट कारोबार बन्द भयो । त्यसपछि १२ बजेर ७ मिनेटमा खुलेको बजार १२ बजेर ९ मिनेटमा नै ६ प्रतिशतले बढेपछि आजका लागि कारोबार रोकिएको छ ।
नेप्से पहिलो १ घण्टामा ४ प्रतिशत बढे २० मिनेटको लागि कारोबार बन्द हुन्छ भने २ घण्टामा ५ प्रतिशत बढे ४० मिनेटको लागि र ६ प्रतिशतले बढे दिनभरिको लागि कारोबार बन्द हुन्छ ।
लामो समयदेखि घट्दो ट्रेण्डमा रहेको शेयर बजार आइतवार भने उछाल आएको छ । मौदिक नीतिको पहिलो त्रैमासिक समीक्षा शेयर बजारमा उछाल आएको हो ।
नेपाल राष्ट्र बैंकले ब्याजदर घटाउने र कर्जा लगानी बढाउने नीति लिएसँगै बजारमा उत्साह देखिएको छ । त्यस्तै शेयर कर्जाको जोखिमभार पनि १५० प्रतिशतबाट १२५ मा झारेको छ । यस कारण पनि लगानीकर्ता उत्साहित भएकाे देखियाे ।
नेप्से परिसूचक ६ प्रतिशत बढेर १ हजार ९६३ दशमलव ९८ विन्दुमा पुगेको छ । २४४ धितोपत्रको १३ लाख ६७ हजार ६१५ कित्ता शेयर ७ हजार १४ पटकमा रू. ४८ करोड २४ लाख बराबरको शेयर कारोबार भएको छ । आइतवार कुल ९ मिनेट मात्रै शेयर कारोबार भएको हो ।
कारोबारमा आएका धितोपत्रमध्ये रिलायन्स फाइनान्स, जोशी हाइड्रोपावर, राप्ती हाइड्रो एण्ड जनरल कन्सट्रक्सन, शुभम पावर र कालिञ्चोक हाइड्रोपावरको शेयर मूल्य १० प्रतिशतका दरले वृद्धि भएको छ । आइतवार एनमबि शुलभ इन्भेष्टमेन्ट फण्ड २ को इकाई मूल्य १ दशमलव ९७ प्रतिशत घटेको छ । इकाई मूल्य रू. ८ दशमलव ४७ कायम भएको हो । त्यस्तै दोस्रोमा एनआईबिएल ग्रोथ फण्डको इकाई मूल्य १ दशमलव ८५ प्रतिशत घटेर रू.७ दशलमव ४२ कायम भएको छ ।
सर्वाधिक शेयर खरीदविक्रीको हिस्सा माउन्टेन इनर्जी नेपालले ओगटेको छ । कम्पनीको रू. ३ करोड ५८ लाख बराबरको शेयर कारोबार भएको हो । यस कम्पनीको शेयर मूल्य प्रतिकित्ता रू. ४९२ कायम भएको छ । त्यस्तै सर्वाधिक शेयर खरीदविक्री हुने दोस्रोमा सोनापुर मिनरल्स एण्ड आयल लिमिटेडको रू. ३ करोड ५८ लाख बराबरको शेयर कारोबार भएको छ ।
यस दिन कारोबारमा आएका १३ओटै समूहगत परिसूचक सबै बढेका छन् । सबैभन्दा बढी हाइड्रोपावर समूहको परिसूचक ८ दशमलव ६३ प्रतिशत वृद्धि भएको हो । त्यस्तै होटल तथा पर्यटन समूहको ६ दशमलव ७२ प्रतिशत र लगानी समूहको परिसूचक ६ दशलमव ४९ प्रतिशत वृद्धि भएको छ ।
आइतवार सेन्सेटिभ इन्डेक्स ६ दशलमव ०९ प्रतिशत, फ्लोट इन्डेक्स ६ दशमलव १४ प्रतिशत र सेन्सेटिभ फ्लोट इन्डेक्स ६ दशमलव ५३ प्रतिशत वृद्धि भएको छ ।
प्रतिक्रिया [0]