खोटाङ । कानून, न्याय तथा संसदीय मामिला मन्त्री धनराज गुरुङले ‘लोभीपापी’ नेता भएको देशका जनताले कहिल्यै सुख नपाउने बताएका छन् ।

खोटाङको हलेसी तुवाचुङ नगरपालिकाले शनिबार अर्खौलेमा आयोजना चौथो नगरस्तरिय अन्तर मावि राष्ट्रपति रनिङ शिल्क प्रतियोगीता उद्घाटनपछि प्रमुख अतिथिका रुपमा सम्बोधन गर्दै मन्त्री गुरुङले देशको मुहार फेर्नका लागि नेताहरु लोभपापबाट मुक्त भएर सदाचारको बाटोमा हिँड्नुपर्नेमा जोड दिएका छन् । ‘जुन देशको नेता लोभीपापी हुन्छ, त्यो देशको जनताले कहीकतै सुख पाएको देखेको छैन ।

त्यसैले हामीजस्ता देश बनाउनका लागि राजनीति गर्ने नेताहरु लोभबाट मुक्त हुन आवश्यक छ । जुन देशका नेताहरु लोभबाट मुक्त हुन्छन्, ती देशहरु छिटोभन्दाछिटो फड्को मारेर विकसित मुलुकको रुपमा रुपान्तरण भइरहेका छन् । जुन देशका नेताहरुभित्र लोभ र पाप रहन्छ, जुन देशको राजनीतिक नेताको मनभित्र, आत्माभित्र लोभको घैंटो रहन्छ तवसम्म त्यो देशका जनताले सुख पाएको मैले देखेको छैन,’ मन्त्री गुरुङले भने, ‘त्यस कारण हामीजस्ता नेता चाहे वडाध्यक्ष किन नहुन्, चाहे त्यो गाउँपालिकाको अध्यक्ष, उपाध्यक्ष किन नहुन्, नगरपालिकाको प्रमुख उपप्रमुख किन नहुन्, या संघीय मन्त्री, प्रधानमन्त्री नै किन नहोस् ।

एउटै लक्ष्य लिन आवयक छ । त्यो यात्रा भनेको सदाचारको यात्रा हो । व्यभिचारको यात्रामा होईन सदाचारको यात्रामा अघि बढ्नुछ । नेताहरुले सदाचार व्यवहार देखाउन आवयक छ ।’

कांग्रेसका उपसभापति रहेका मन्त्री गुरुङले नेताहरु व्यभिचारी भए देशले र जनताले दुःख पाउने उल्लेख गरे । उनले देशको मुहार बदल्नका लागि पहिला आफै बदलिनु पर्ने धारणा राखेका छन् । ‘देशको उज्यालो भविष्य खोज्नका लागि धेरै भौतारिनु अवाश्यक छैन । आफुलाई सुधार्न आवश्यक छ । बदलिन आवश्यक छ,’ गुरुङले भने, ‘देशको मुहार बदल्नका लागि पहिला आफै बदलिन पर्छ । आफै बदलिएर देशको मुहार बदल्ने यात्रामा अघि बढौं ।’

मन्त्री गुरुङले नेपाली राजनीतिको लक्ष्य ‘समुन्नत नेपाल र समृद्ध नेपाल’ बनाउने हुनुपर्ने बताएका छन् । ‘मेरो लक्ष्य नेपाली जनतालाई माथि उठाउनु हो । नेपाली जनताको जीवनस्तर माथि उठाउनु हो । समुन्नत नेपाल बनाउनु हो । मन्त्री पद त आउँछ जान्छ तर नेपाली जनताको जीवनस्तर माथि उठाउन पाइयो भने, नेपाललाई समुन्नत बनाउन पाइयो भने नेपालको गौरब माथि उठ्छ । मेरो अर्जुन दृष्टि त्यहीँतिर छ,’ उनले भने, ‘मुलुकलाई माथि उठाउनु छ । विपन्न बर्गलाई माथि उठाउनु छ । मुलुकलाई विपन्नताबाट सम्पन्नतातर्फ लैजानु छ । समुन्नत नेपाल बनाउनु छ, समृद्ध नेपाल बनाउनु छ । त्यो नेपाली राजनीतिको लक्ष्य हुनुपर्दछ । समग्र नेपाली राजनीतिको लक्ष्य हुन आवयक छ ।’

राजनीति कठिन यात्रा भएको उल्लेख गर्दै गुरुङले त्यही कठिन यात्राभित्र हरेक नेपालीको उज्यालो भविष्य खोज्नुपर्नेमा धारणा राखेका छन् । ‘राजनीतिमा लाग्नु भनेको मस्त गर्नु होईन । रजगज गर्नका लागि होईन । राजनीतिक यात्रा भनेको कठिन यात्रा हो । त्यो कठिन यात्रामा हरेक विद्यार्थीको उज्यालो भविष्य खोज्नु छ । त्यही राजनीति यात्राभित्र हरेक नेपालीको उज्यालो भविष्य खोज्नु छ । हरेक नागरिकको उज्यालो भविष्य खोज्न जरुरी छ,’ उनले भने, ‘त्यो लक्ष्य प्राप्तीका लागि कहीँकतै विचलित नभइकन अगाढि बढ्न आवश्यक छ । यदि विचलन आयो भने फेरी हामीले देखेको लक्ष्य प्राप्त गर्न सक्दैनौं । हामीजस्ता नेताले परिश्रम गर्न आवश्यक छ । त्याग गर्न आवश्यक छ । लोभबाट मुक्त हुन आवश्यक छ ।’

(25 पटक भ्रमण गरिएको, आज 25 पटक भ्रमण गरिएको)