धनगढी । कैलालीको धनगढी उपमहानगरपालिकामा ५ महिनामा ४८ किलोमिटर सडक ग्राभेल भएको छ । यातायात सञ्चालनमा कठिनाई भइरहेका सडकहरूको पहिचान गरी उपमहानगरपालिकाले गत असोज १४ गतेबाट ग्राभेल गर्ने काम सुरु गरेको थियो । उपमहानगरपालिका कार्यालयका अनुसार १९ वडामध्ये हालसम्म १२ वटा वडाका गरी ४८ किलोमिटर सडक ग्राभेल कार्य पुरा भएको छ ।

५ महिनामा ४८ किलोमिटर सडक ग्राभेलिङ

उपमहानगरपालिका कार्यालयका अनुसार ग्राभेलिङका लागि सडक पहिचान गर्ने क्रममा सबैभन्दा बढी प्राथमिकतामा एक पटक पनि ग्राभेल नपुगेका सडकहरूलाई राखिएको छ । यस क्रममा अहिलेससम्म ४८ किलोमिटर सडक ग्राभेलिङ भएको छ । भने बाँकी सडकहरूमा पनि ग्राभेल गर्ने काम अघि बढाइएको छ । हालसम्म ग्राभेलिङमा एक करोड ६७ लाख २९ हजार रुपैयाँ खर्च भएको उपमहानगरपालिकाले जनाएको छ ।

उपमहानगरपालिका कार्यालयको तथ्यांकअनुसार अहिले वडा नम्बर ६ र ११ मा सडक ग्राभेलिङ कार्य जारी छ । त्यस्तै, अब वडा नम्बर ७, ८, ९ र १० का सडकहरूमा मात्र ग्राभेल गर्ने काम बाँकी रहेको छ । उपमहानगरपालिकाले चालू आर्थिक वर्ष २०८०/०८१ मा २ करोड ८० लाख ७६ हजार रुपैयाँ ग्राभेलका लागि खर्च गर्ने जनाएको छ ।

उपमहानगरपालिकाको तथ्यांकअनुसार वडा नम्बर १ मा ग्राभेलिङका लागि १६ लाख रुपैयाँ विनियोजन गरिएको थियो । वडा १ मा ग्राभेलिङमा १४ लाख ५४ हजार पाँच सय ३० रुपैयाँ लागतमा दुई हजार नौ सय ३० मिटर सडक ग्राभेल भएको छ । त्यस्तै, वडा नम्बर २ मा ग्राभेलका लागि २४ लाख रुपैयाँ विनियोजन गरिएकोमा २३ लाख ६२ हजार ८ सय ७५ रुपैयाँ लागतमा ६ हजार सात सय ५८ मिटर सडक ग्राभेल भएको छ ।

त्यस्तै, वडा ३ मा ग्राभेलका लागि १५ लाख रुपैयाँ छुट्याइएकोमा ३ हजार ६ सय ९५ मिटर सडक ग्राभेलिङमा ९ लाख ८५ हजार ८ सय २९ रुपैयाँ खर्च भएको छ । वडा नम्बर ४ मा सो कार्यका लागि १० लाख रुपैयाँ विनियोजन गरिएकोमा ९ लाख ८५ हजार रुपैयाँ खर्च गरेर ३ हजार आठ सय ६० मिटर सडक ग्राभेल भएको छ ।

त्यस्तै, वडा नम्बर ५ मा ग्राभेलिङमा २० लाख रुपैयाँ विनियोजन गरिएको थियो । वडा ५ मा १० लाख ९ हजार रुपैयाँको लागतमा ३ हजार १ सय ६ मिटर सडक ग्राभेल भएको छ । भने, वडा १२ मा चालू आर्थिक वर्षमा ग्राभेलका लागि ११ लाख रुपैयाँ विनियोजन गरिएकोमा ३ हजार १० मिटर सडक ग्राभेलिङमा १० लाख ८० हजार रुपैयाँ खर्च भएको छ ।

त्यस्तै, वडा १३ मा ग्राभेल कार्यमा ११ लाख ६७ हजार रुपैयाँ छुट्याइएकोमा ३ हजार ८ सय ६० मिटर सडक ग्राभेलिङमा ११ लाख ३४ हजार रुपैयाँ खर्च भएको उपमहानगरपालिकाले जनाएको छ ।

वडा नम्बर १४ मा सो कार्यका लागि १६ लाख रुपैयाँ विनियोजन गरिएकोमा हालसम्म १४ लाख ३९ हजार रुपैयाँ खर्च भएको छ । सो रकमबाट तीन हजार ६ सय ७७ मिटर सडक ग्राभेल गरिएको छ । वडा १५ मा १० लाख रुपैयाँ विनियोजन गरिएको थियो । ३ हजार ८ सय ५३ मिटर सडक ग्राभेलिङमा ९ लाख ९९ हजार चार सय रुपैयाँ खर्च भएको छ । त्यस्तै, वडा १६ मा ग्राभेलका लागि चालू आर्थिक वर्षमा ५ लाख ५० हजार रुपैयाँ विनियोजन गरिएकोमा १ हजार २ सय १९ मिटर सडक ग्राभेल गर्दा ५ लाख तीन हजार चार सय ५६ रुपैयाँ खर्च भएको छ ।

वडा १७ मा ग्राभेल कार्यका लागि १२ लाख रुपैयाँ विनियोजन गरिएको थियो । सोमध्ये ११ लाख ९६ हजार रुपैयाँ खर्च ४ हजार एक सय ९८ मिटर सडक ग्राभेल गरिएको छ । त्यस्तै, वडा नम्बर १८ मा ११ लाख ५० हजार रुपैयाँ छुट्याइएकोमा ३ हजार ४ सय २० मिटर सडक ग्राभेल गर्दा १४ लाख ८५ हजार रुपैयाँ खर्च भएको छ । वडा नम्बर १९ मा ग्राभेलका लागि १७ लाख ५० हजार रुपैयाँ विनियोजन गरिएकोमा ४ हजार ५ सय १ मिटर सडक ग्राभेलिङमा १६ लाख २३ हजार रुपैयाँ लागत लागेको छ ।

सडक ग्राभेलिङमा ३ हजार तीन सय ३ ट्रिप टिप्पर ग्राभेल (२५ हजार ४ सय ९३ घनमिटर) खर्च भएको छ । उपमहानगरपालिकाका कच्ची सडकहरूलाई ग्राभेलिङका लागि प्राथमिकतामा राखिएको थियो ।

उपमहानगरपालिका कार्यालयका अनुसार सबै १९ वडामा २ करोड ८० लाख ६७ हजार रुपैयाँ ग्राभेलका लागि विनियोजन गरिएको थियो । पछिल्लो ५ महिनामा ग्राभेल कार्यमा एक करोड ६७ लाख २९ हजार २ सय ३१ रुपैयाँ खर्च भएको उपमहानगरपालिकाले जनाएको छ ।

उपमहानगरपालिकाले चालू आर्थिक वर्ष २०८०/०८१ मा सडक ग्राभेलिङका लागि ७ वटा ब्याको लोडर र ११ वटा टिप्परहरूको प्रयोग गरेको छ ।

(१७ पटक भ्रमण गरिएको, आज १७ पटक भ्रमण गरिएको)