नेपाली कांग्रेस गण्डकी प्रदेशको प्रथम सम्मेलनको ब्यानरबाट ‘भ्रष्टाचारीबाट पार्टीलाई जोगाऔं’ भन्ने वाक्य हटाइएको छ।
नेपाली कांग्रेस गण्डकी प्रदेश समितिको प्रथम सम्मेलनको ब्यानरमा ‘इमान भएकाहरुलाई जिम्मेवारीमा राखौं, भ्रष्टाचारीबाट पार्टीलाई बचाऔं, कांग्रेसी चरित्र पुर्नस्थापित गरौं’ भन्ने लेखिएको थियो।
तर पार्टी सभापति शेरबहादुर देउवाले सो नारामा लेखिएको ‘भ्रष्टाचारीबाट पार्टीलाई बचाऔं’ भन्ने वाक्य हटाउन लगाएका हुन्।
देउवाले पार्टीका गण्डकी प्रदेश सभापति शुक्रराज शर्मालाई सो वाक्य हटाउन दबाब दिएका थिए। सो क्रममा सभापति देउवा र प्रदेश सभापति शर्माबिच भनाभन पनि भएको बताइएको छ।
देउवाको दबाबपछि मञ्चको पर्दा झारेर सो वाक्यलाई टेपले टालेर कार्यक्रम सञ्चालन गरिएको थियो।
कार्यक्रममा बोल्ने क्रममा महामन्त्री गगन थापाले सो विवादबारे कोट्याए। उनले भने, ‘भ्रष्टाचारीलाई हटाउँछु भनेर ब्यानरमा लेखे पनि, छोपे पनि व्यवहारमा भयो भने भयो, व्यवहारमा भएन भने भएन।’
प्रकाशित: ३ पुस २०८० २०:०५ मंगलबार