आतंकवादी समूह हमासले शनिबार इजरायलमाथि गरेको आक्रमणमा परी १० जना नेपालीहरूको मृत्यु भएको इजरायलस्थित नेपाली राजदूतावासले पुष्टि गरेको छ।
आइतबार साँझ ढिला गरी एक विज्ञप्ति जारी गर्दै हमास समूहको आक्रमणबाट १० नेपालीहरुको मृत्यु भएको दूतावास जनाएको हो। यद्यपि दूतावासले मृतकहरुको नाम भने आधिकारिक रुपमा खुलाएको छैन। उसले मृतकहरुको नाम र ठेगाना छिटै सार्वजनिक गरिने विज्ञप्ति मार्फत बताएको छ।
दूतावासले आक्रमणमा घाइते भएका ४ जनाको स्थानीय अस्पतालमा उपचार भइरहेको र सम्पर्क विहीन एक जनाको खोजी कार्य भइरहेको जनाएको छ। उनीहरूको बारेमा पनि दूतावासले विस्तृतमा खुलाएको छैन।
दूतावासका अनुसार मृतकहरुको शव नेपाल फिर्ता पठाउन इजरायल सरकारसँग आवश्यक समन्वय भइरहेका छ।
नेपालीहरुको स्वदेश फिर्तीको लागि राजदूतावासबाट नेपाल सरकार र इजरायल सरकारसँग आवश्यक समन्वय गरी विवरण संकलनको लागि छिट्टै अनलाइन रजिष्ट्रेशनको व्यवस्था गरिने जारी विज्ञप्तिमा भनिएको छ।
दूतावासले इजरायलमा रहेका नेपालीहरुलाई संयमता अपनाई आवश्यक समन्वय र सहयोग गर्न अनुरोध गरेको छ।
‘नेपाल फर्कन इच्छुक हुने नेपालीहरुको स्वदेश फिर्तीको लागि राजदूतावासबाट नेपाल सरकार र इजरायल सरकारसँग आवश्यक समन्वय गरी विवरण संकलनको लागि छिट्टै अनलाइन रजिष्ट्रेशनको व्यवस्था गरिँदै छ। मृतकहरुको शव फिर्ता गर्न र इच्छुक नेपालीहरुलाई उद्धार गरी स्वदेश फिर्ता गराउन नेपाल सरकारले आवश्यक प्रबन्ध गर्ने भएको छ। इजरायलमा रहनु भएका सम्पूर्ण नेपालीहरुलाई संयमता अपनाई दूतावाससँग आवश्यक समन्वय र सहयोग गर्न हार्दिक अनुरोध गरिन्छ।’ जारी विज्ञप्तिमा उल्लेख छ।
प्रकाशित: २१ आश्विन २०८० २३:५५ आइतबार