रूपन्देहीको भैरहवामा बसेर लुम्बिनी प्रदेशका विभिन्न स्थानको भ्रमण गर्ने तालिकासहित आएका पूर्वराजा ज्ञानेन्द्र शाहले कपिलवस्तु, नवलपरासी र रूपन्देहीका विभिन्न धार्मिक स्थलहरूको अवलोकन भ्रमण गर्ने भएका छन्।

धार्मिक एवं साँस्कृतिक भ्रमणका लागि भन्दै उनी परिवारसहित सोमबार भैरहवा आएका हुन्। उनले रूपन्देही, कपिलवस्तु र पश्चिम नवलपरासीका विभिन्न ऐतिहासिक, पुरातात्विक, धार्मिक तथा पर्यटकीय स्थलहरूको अवलोकन भ्रमण गर्ने तालिका रहेको सचिवालयले जनाएको छ। रूपन्देहीमा उनले नीलकण्ठ बाबाधाम, दर्बाहा मन्दिर, बुटवल सिद्धबाबा मन्दिर, जितगढी किल्ला, शुद्दोधनको शिवाहा मन्दिरलगायतका स्थानको अवलोकन भ्रमण गर्ने पूर्वराजा नागरिक अभिनन्दन समारोह समितिका संयोजक डा. रामप्रसाद बस्यालले जानकारी दिए।

उनका अनुसार पुस १४ गते पूर्वराजा शाहा कपिलवस्तु पुग्नेछन्। त्यहाँ उनले तिलौराकोटलगायतका अन्य धार्मिक स्थलहरूको अवलोकन भ्रमण गर्नेछन्। पुस १७ गते उनी नवलपरासी पुग्नेछन्। नवलपरासी बर्दघाट सुस्ता पश्चिममा कार्यक्रम रहेको बताइएको छ।

त्यस्तै पुस १९ गते भैरहवाको सुगरमिल क्षेत्रमा पूर्वराजा शाहको अभिनन्दन कार्यक्रम रहेको संयोजक डा. बस्यालले जानकारी दिए। पूर्वराजा शाह पत्नी कोमलराज्य लक्ष्मी देवी शाह र परिवारका अन्य सदस्यसहित धार्मिक कार्यक्रमका लागि रूपन्देही आएको उनको सचिवालयले जनाएको छ। सोमबार शाहलाई भैरहवामा स्वागत गरिएको थियो।

प्रकाशित: ११ पुस २०८० ०७:२३ बुधबार