नेपाल प्रहरी स्कुलमा माध्यमिक तहको शिक्षिका हुँदै दुई दशकभन्दा अघिदेखि राष्ट्र सेवा समर्पित गोमा पराजुली अर्थात कञ्चन। अध्यापन गर्दागर्दै प्रहरी सेवामा आएकी उनी अहिले प्रहरी अधिकृत छिन्। नेपाल प्रहरीको सङ्गठनभित्र उनी हक्की महिला अधिकृतका रुपमा परिचित छिन्। जिम्मेवारीको कामबाहेक समाजसेवामा पनि उनी उत्तिकै सक्रिय छिन्। ड्युटी सकिएपछि उनी सामाजिक काममा खटिन्छिन्।
प्रहरीको तलब नै कति हुन्छ र सरकारले दिने सुविधाले आफैँलाई खान नै ठिक्क हुन्छ। यस्तो अवस्थामा पनि उनी आफ्नो पारिश्रमिकबाट पीडित, असहायहरूलाई मद्दत गर्छिन्। ड्युटीमा आउजाउ गर्दा होस् या घरेलु कामकाजका बेला, उनी सडक पेटी तथा मठमन्दिरमा रहेका अनाथ, उपचार नपाएर भौँतारिइरहेका बिरामी देख्दा सहयोग गर्न अग्रसर हुन्छिन्।
‘ड्युटीको क्रममा पनि कहीँकतै कसैलाई समस्या परेको देख्नुभयो भने गाडीबाट ओर्लिएर सहयोग गरिहाल्नु हुन्छ। अप्ठ्यारोमा परेका कतिपय बिरामीलाई उपचारार्थ उनले हस्पिटलसम्म पु¥याएको देखेकी छु,’ पराजुली सँगै काम गरेकी एक प्रहरी कर्मचारी भन्छिन्।
कञ्चनले शंखमुल आश्रम सेवा, गाईमाता, आश्रम सेवा, स्वर्गद्वारी आश्रम सेवा, मुक्तिनाथ आश्रम सेवा लगायतका आश्रमहरूमा आवश्यकता अनुसारको सहयोग समय समयमा गरिरहन्छिन्। वृद्धाश्रमको भने उनी आजीवन पनि सदस्य हुन्। सामाजिक काम गर्दा उनी आफूलाई पेसाबाट चिनाउन खोज्दिनन्।
आफ्नो परिचय गोप्य राख्दै सेवा गर्ने उनको बानी छ। ‘समस्यामा परेका, दुःख पीडामा रहेकाहरूलाई सेवा गर्नु मानवीय धर्म हो। आफ्नो धर्म निर्वाह गरेको कुराको प्रचार गर्नु मलाई उचित लाग्दैन,’ उनी भन्छिन्, ‘त्यसैले जो कसैले सामाजिक काम गरेर समाचार बनाउने, मिडियाबाजी गर्ने जस्ता काम गरेको मलाई मन पर्दैन।’
सबैले आफ्नो दक्षता र क्षमताले भ्याएसम्म परोपकारी काम गर्नुपर्ने उनको तर्क छ। ‘अरूको भलो चिताउने,अरूको राम्रो गर्ने मान्छेको सधैं राम्रो नै हुन्छ,’ उनी भन्छिन्।
उनी जनावरलाई पनि उत्तिकै माया गर्छिन्। हरेक हप्ता काठमाडौँका सडक तथा विभिन्न मठमन्दिरमा रहेका जनावर तथा विशेष गरी बाँदर,गाई र कागहरूलाई उनी आहारा खुवाउने, फलफूलहरू लगेर बाँड्ने पनि गर्छिन्।
उनको सामाजिक काममा जति लगाव छ, त्यति नै पुलिसिङमा पनि रहेको प्रहरी कर्मचारीहरू बताउँछन्। उनले लगनशील र इमान्दार प्रहरी अफिसरको छवि बनाएकी छन्।
गौर हत्याकाण्डका बेला उनले नेपाल प्रहरी स्कुल रौतहटमा १३ सय विद्याथीलाई एउटै कोठामा राखेर एक्लै सुरक्षा गरेको तत्कालीन प्रहरी अधिकृतहरू बताउँछन्। तत्कालीन माओवादीले विद्यालयमा कार्यरत एक विद्यार्थीको अपहरण गरेपछि उनले अन्य विद्यार्थीहरुको सुरक्षामा एक्लै खटिएपछि उनको चौतर्फी प्रशंसा भएको तत्कालीन समयमा रौतहटमा कार्यरत प्रहरीहरू बताउँछन्।
यस्तै,उनी जनसेवा प्रतिभा पुरस्कारबाट सम्मानित भएकी थिइन्। उनी हालसालै नेपाल सरकारको अर्थ मन्त्रालय अन्तर्गत पर्ने सार्वजनिक वित्त व्यवस्थापन तालिम केन्द्रले आयोजना गरेको आर्थिक प्रशासन सम्बन्धी सहायक स्तरीय सेवाकालीन कार्यक्रममा उत्कृष्ट प्रहरी अफिसरका रुपमा समेत सम्मानित भएकी छिन्।
प्रकाशित: १ चैत्र २०८० १४:२७ बिहीबार