जंगलमा लागेको डढेलोबाट उम्केको आगो गाउँ पस्दा उदयपुरमा एक स्थानीयको घर गोठमा क्षति पुगेको छ।
जिल्लाको ताप्ली गाउँपालिका-१ स्थित ओख्ले डाँडागाउँको जंगलमा सल्केको डढेलोको झिल्को स्थानीय रमेश मगरको घर गोठसम्म आइपुग्दा उनकाे घर गोठ जलेर नष्ट भएकाे हाे।
गाउँपालिकाका अध्यक्ष ढुंगाराज विश्वकर्माका अनुसार घटना (आज) बुधबार दिउँसाे ३ बजेतिरकाे हाे। सल्लाघारी जंगलमा लागेको डढेलो हावाहुरी चलेकै कारण गाउँसम्म आइपुगेर क्षति भएको अध्यक्ष विश्वकर्माले बताए।
दिउँसोको समय भएकाले गाईबस्तु र मान्छे घर गोठमा नहुँदा आगोले मानवीय र चौपाया क्षति भने हुन नपाएको उनले बताए।
आगोले मगरको ढुंगामाटोले बनेको कच्ची घर र गोठ जलाउँदा घरभित्र रहेको अन्नपात, लत्ताकपडा, भाँडाकुँडालगायत सम्पूर्ण सामग्री जलाएर नष्ट पारेको छ।
वडाध्यक्ष उद्धव हमालका अनुसार आगो अन्यत्र फैलिन नदिन स्थानीयहरु जुटेर पहिला मगरको घरको आगो नियन्त्रणमा लिएर जंगलको डढेलो पनि साँझसम्ममा निभाइएको छ।
आगोले मगरको क्षति कति भयो भन्ने कुराको यकिन भने भइसकेको छैन। घट्नाबारे अनुसन्धान बिहीबार बिहान हुने र क्षति विवरण खुल्ने उनले बताए।
जंगलमा डढेलो कसरी लाग्यो भन्ने पनि खुलिसकेको छैन। गाई बस्तु चराउनेहरुले आगो लगाएको हुनसक्ने गाउँलेहरुले अनुमान गरेका छन्।
इलाका प्रहरी कार्यालय कटारीबाट डिएसपी सुभाष राईले आगलागीको घट्नाबारे जानकारी आएलगत्तै टोली घटनास्थल पठाइएर स्थानीय प्रहरी चौकी रुपाटारको सहकार्यमा आगो नियन्त्रणमा ल्याइएको बताए।
उनका अनुसार गाउँपालिका केन्द्र रुपाटारबाट एक घण्टामा पुगिने घटनास्थलमा प्रहरी टोली पुग्दा मगरको घर गोठ सबै जलिसकेको थियो।
प्रकाशित: २४ माघ २०८० २०:१७ बुधबार