नेपाली कांग्रेसका महामन्त्री गगन थापाले अन्य पार्टीका जस्तो ०८४ को चुनावी चिन्ता नगरी काम गर्नुपर्ने बताएका छन्।
कटारीमा शुक्रबार आयोजित उदयपुर पार्टीको प्रथम सम्मेलनको उद्घाटन गर्दै महामन्त्री थापाले ०८० देखि ०८३ सम्मको ४ वर्षे अवधिमा कांग्रेसले कुरा होइन, काम गरेर देखाउनुपर्नेमा जोड दिए।
‘सबै पार्टीहरूले मिसन ०८४ भनेर चुनावलक्षित कार्यक्रम गर्दै हिँडेका छन् तर, मलाई लाग्छ चुनावको चिन्ता लिइराख्नुपर्दैन’ महामन्त्री थापाले भने ‘०८० देखि ०८४ सम्मको ४ वर्षे अवधिमा सरासर काम गरेर देखाऊँ, कांग्रेस यो बीचमा सरासर काम गरेर देखाउँछौँ, तपाँईहरु पनि त्यो बेलाको चुनावको चिन्ता अहिलेदेखि लिइराख्नुपर्दैन।’
जनताले अहिले काम खोजेको भन्दै राम्रा काम गर्दै गएपछि चुनावको मिसन बनाइरहन नपर्ने उनको भनाई थियो। उनले राम्रा काम गर्ने पार्टीलाई जनताले त्यसै भोट दिएर जिताउने विश्वास पनि लिए।
कांग्रेसले ५ लाख युवालाई रोजगारी दिने गरी कार्यक्रम ल्याउने भन्दै उनले त्यसका लागि सरकारलाई अघि बढ्न सुझाए। तर, सेना, प्रहरी, निजामती, वित्तीय संस्था र निजी क्षेत्र सबैमा गरी वर्षमा ५० हजार पनि रोजगारी सिर्जना हुने अवस्था नरहेकाले कांग्रेससमेतको गठबन्धन सरकारलाई सघाउँदै युवा पलायन रोक्ने कार्यक्रम ल्याउने प्रतिबद्धता जनाए।
अहिले मुलुकमा चरम निराशा बढिरहेको र केही तत्त्वले संघीय लोकतान्त्रिक गणतन्त्रको व्यवस्था परिवर्तनको कुरा जबरजस्ती बहसमा ल्याइएको भन्दै थापाले यसो हुनुमा कांग्रेस लगायत ठूला पार्टीहरूकै कमजोरी रहेको औँल्याए।
अब ती कमीकमजोरीहरू कांग्रेसले पहिले आफू सच्चिएर र बिस्तारै अरूलाई सच्याउँदै अघि बढ्नुपर्ने प्रतिबद्धता थापाले जनाए। यति बेला खस्कँदो अर्थतन्त्र, चरम बेरोजगारी र सामाजिक सञ्जालमा आएका कुराहरूको विश्लेषण गरेर जनताको ठूलो हिस्सा नराम्ररी रिसाएको या निराश भएको थापाको भनाई थियो।
बाउआमा, छोराछोरी नेपालमा नबसेकोमा निराश, युवा पिँढी रोजगारी नपाएकोमा र विदेशमा दुःख गरी आएकाहरू स्वदेशमै जीविकोपार्जन गर्न नसकेकोमा निराश भएको महामन्त्री थापाको भनाई थियो।
निराश र रिसाएको डेढ करोड जनतामा आशा जगाउने काम अब कांग्रेसले गर्ने भन्दै त्यसका लागि केन्द्रदेखि वडा समितिसम्मका नेता कार्यकर्तालाई निर्देशन दिए।
नेपालको पुरानो, जेठो र ठूलो पार्टी भएको नाताले अभिभावकको भूमिका निर्वाह गर्नुपर्ने भन्दै उनले जनतामा छाएको निराशालाई आसामा परिणत गर्ने जिम्मेवारी वहन गन कांग्रेस तयार रहेको बताए।
‘ठूलो र पुरानो पार्टी भएकाले कांग्रेस देशको अभिभावक पनि हो’ थापाले भने ‘त्यसैले जनतामा छाएको निराशालाई आसामा परिणत गर्न, बेथितिलाई हटाएर थिति बसाल्ने जिम्मा कांग्रेसले नै लिनुपर्छ।’
अहिले देशमा पहिचान, धर्म, जात, भूगोल सबै खालका कुराहरू उठिरहेको भन्दै त्यस्ता सबै समस्याको समाधान गर्न कांग्रेसले अगुवाइ गर्नुपर्ने उनको भनाइ थियो। त्यसका लागि कांग्रेसले अन्य दलहरू पनि मिलाएर जानुपर्ने भन्दै थापाले त्यसका लागि पनि कांग्रेस तयार हुनुपर्ने बताए।
कांग्रेस आफ्नो धर्म मान्ने र अरुको धर्मलाई पनि सम्मान गर्नुपर्ने अडानमा रहेको उनले बताए। सबै देशवासीले पहिचान, भूगोल, धर्म र जातमा, आस्था र गर्व गर्न पाउने भन्दै उनले कांग्रेसले जनताको आस्थालाई सम्मान गर्दै अघि बढ्ने सुनाए।
महामन्त्री थापाले अहिले भ्रष्टाचार सबभन्दा डरलाग्दो गरी मौलाएको भन्दै एकपछि अर्को काण्ड मच्चिएको सन्दर्भ उठाउँदै ०४६ सालयताका सम्पूर्ण पूर्व उच्च पदस्थ व्यक्तिहरूको सम्पत्ति छानबिन गर्नुपर्ने माग गरे।
उनले ०४६ सालदेखि अहिलेसम्मका प्रधानमन्त्री, मन्त्री, सांसद, आइजिपी, प्रधानसेनापतिलगायत सम्पूर्ण पूर्व उच्च पदस्थहरूको सम्पत्ति छानबिन गर्ने प्रस्ताव आफूले संसद्मा पेश गर्ने बताए।
त्यसरी छानबिन गर्दा अकुत सम्पत्ति देखिएमा सबै देशको ढुकुटीमा राख्ने व्यवस्था मिलाउनुपर्ने थापाको भनाइ थियो।
गणतन्त्रमा अनुत्पादक खर्च भएको भनेर प्रदेश खारेजीको कुरा उठेको भन्दै उनले कांग्रेसले पञ्चायतकलामा १४ अञ्जल ७५ जिल्लामा भएको खर्चभन्दा कम बजेटमा ७५३ स्थानीय तह र ७ प्रदेश चलाउन सक्ने आर्थिक खाका पनि ल्याउने थापाले बताए।
उनले खर्चका कारण संघीयता धरापमा पर्ने कुरामा कसैलाई शंका नगर्न पनि सुझाए। आर्थिक अनुशासनहीनता भने बढेको देखिएकाले संघ, प्रदेश र स्थानीय तहले मितव्ययिता अपनाउनुपर्नेमा उनको जोड थियो।
सहमहामन्त्री भिष्मराज आङदम्बेले नेपाली कांग्रेस राणा, पञ्चायत र राजा फालेर आएको ऐतिहासिक र लोकतान्त्रिक पार्टी भएको बताए।
नेपाली कांग्रेस भ्रष्टाचारको सवालमा शून्य सहनशीलता अपनाएर अघि बढ्ने भन्दै सहमहामन्त्री आङदम्बेले त्यसमा केन्द्रदेखि प्रदेश, जिल्ला, स्थानीय हुँदै वडा पार्टीसम्मले भूमिका खेल्नुपर्नेमा जोड दिए।
कोशी प्रदेशमा जारी पहिचान पक्षधरको आन्दोलनतर्फ संकेत गर्दै पहिचानको मुद्दा पेचिलो भइरहेकाले आफ्नो भूगोल, पहिचान र धर्म प्रति सबैको लगाव हुनुलाई स्वाभाविक अर्थ्याए। जारी आन्दोलनप्रति कांग्रेस सचेत रहेको बताउँदै उनले संविधान अपरिवर्तनीय दस्ताबेज नभएकाले जनताको माग समेट्दै अघि बढ्न कांग्रेसले भूमिका खेल्नुपर्नेमा जोड दिए।
अहिले कांग्रेसी नेताहरू बोल्नेभन्दा काम गर्ने ठाउँमा रहेको भन्दै उनले सबैलाई गफमा होइन, काममा ध्यान दिन आग्रह गरे।
कार्यक्रममा मुख्यमन्त्री केदार कार्कीले अहिलेसम्मका सरकारले भौतिक विकासमा मात्र बजेट छुट्याउदै आएको तर, मानवीय विकासमा कसैको ध्यान नदिएको भन्दै आफू मुख्यमन्त्री भएपछि मानवीय विकासमा काम गर्न लागेको बताए।
उनले प्रदेशका १० वर्षमुनिका बालबालिकालाई चालु आर्थिक वर्षदेखि नै निःशुल्क उपचार सेवा दिने कार्यक्रम घोषणा गर्ने तयारीमा रहेको बताए।
त्यसैगरी मासिक १५ सय पारिश्रमिकमा रातदिन गाउँघरमा बिरामीको सेवामा खट्दै आएका महिला स्वास्थ्य स्वयंसेविकाहरूलाई पनि प्रदेश सरकारले सम्मानसहित सर्दाम दिन लागेको योजना सुनाए।
मुख्यमन्त्री कार्कीले विराटनगरमा खोल्ने भनिएको कांग्रेस नेतृ स्व. शैलजा आचार्य स्मृति हृदय रोग केन्द्रलाई छिट्टै सञ्चालनमा ल्याएर प्रदेशवासी जनतालाई सकेसम्म निःशुल्क मुटुको उपचार सेवा दिन लागेको कुरा पनि बताए।
कटारी अस्पताललाई ५० शय्यामा स्तरोन्नति गर्न प्रस्ताव बनाएर मन्त्रालयमा पेश गर्न आग्रह गर्दै प्रदेशबाट सक्दो सहयोग गर्ने बचन दिए।
पूर्व मुख्यमन्त्री उद्धव थापा, पार्टी केन्द्रीय सदस्यहरू डा. डिला संग्रौला, राजिव ढुंगाना, लक्ष्मी परियारलगायत वक्ताहरूले सिद्धिचरण लोक मार्गको निर्माण गर्न, भ्रष्टाचारबाट मुक्त रहन र पार्टी सङ्गठनप्रति दृढ भएर लागी पर्न आग्रह गरेका थिए।
प्रकाशित: ६ पुस २०८० २१:४५ शुक्रबार