काठमाडौं । घनश्याम लामिछाने निर्देशित चलचित्र ‘चित्रा’ २७ पुषबाट देशव्यापी रिलिज हुँदैछ । यो चलचित्रमा तीन जना अभिनेत्री मुख्य भूमिकामा छन् । तर चलचित्रको रिलिजको समयमा तीनै जना अभिनेत्रीहरुले आफुहरुलाई प्रचार प्रसारको लागि समय नदिएको यसका निर्माता र निर्देशकको गुनासो छ ।

बिहिबार काठमाडौंमा आयोजित पत्रकार भेटघाट कार्यक्रममा यो चलचित्रका कुनै पनि अभिनेत्री उस्थित भएनन् । बिहिबार मात्र हैन, यस अघि पनि यो चलचित्रको टिजर रिलिजदेखि अन्य कार्यक्रममा पनि अभिनेत्रीहरु सहभागी भएनन् । उनीहरु यतिबेला निर्माण पक्षकालागि बेखबर छन् ।

यो चलचित्रको निर्माता समेत रहेका मुख्य अभिनेता सन्तोष अधिकारीले आफुलाई यतिबेला अभिनेत्रीहरुले साथ नदिनुको कारण नै बुझ्न सकेका छैनन् । यो चलचित्रमा मेनुका प्रधान, शुभेच्छा खड्का र अन्जना बराइलीसहित तीन अभिनेत्री छन् । जस मध्य अभिनेत्री शुभेच्छा खड्का यतिबेला बिदेशमा छिन् । यो चलचित्रको रिलिजमा पनि नेपाल आउन नसक्ने भनेर शुभेच्छाले निर्माता र निर्देशकलाई खबर पठाएकी छिन् । तर बाँकी दुई अभिनेत्रीहरु भने काठमाडौंमा हुँदा हुँदै पनि फिल्मको प्रोमोसनमा सहभागी भएका छैनन् ।

यो चलचित्रका अभिनेता एवम् निर्माता सन्तोष अधिकारीले राजधानीसँग भने,‘हामीले नायिकाहरुलाई हरेक कार्यक्रममा बोलाएका छौं तर उहाँहरुले केही न केहीमा आफ्नो व्यस्तता देखाएर चलचित्रको प्रोमोसनमा पटक्कै समय दिनुभएको छैन । उहाँहरुले किन यसो गरिरहनु भएको छ भन्नेकुरा मैले बुझ्न सकेको छैन ।’

यो चलचित्रमा अभिनेत्रीहरुलाई पुरा पारिश्रमिक नदिएको हो की भन्ने सञ्चारकर्मीहरुको जिज्ञाँसामा सन्तोषले भने,‘मैले चलचित्रको डविङ गर्ने क्रममै सबै कलाकारहरुको पारिश्रमिक पूर्ण रुपमा दिईसकेको छैन । अर्कोतर्फ पारिश्रमिक पुरा नदिएसम्म चलचित्र सेन्सर नहुने भएकाले पनि मैले कसैको पारिश्रमिक रोकेको छैन ।’

यो चलचित्रमा सन्तोष अधिकारी, अर्पण थापा, प्रमोद अग्रहरी, मेनुका प्रधान, प्रकाश घिमिरे, शुभेच्छा खड्का, अन्जना बराइली, सिम्रन खड्का, आयुशी ढकाल, विनोद पौडेल, कपिल शर्मा, कुमार गुरुङ, उज्वल ढकाल, दिपेश गजुरेललगायतको मुख्य भूमिका छ । ‘आमा’ फिल्मका सह–निर्माता समेत रहेका सन्तोषले यही फिल्मबाट अभिनयमा डेब्यू गरेका हुन् ।

यो चलचित्रका अर्का अभिनेता प्रमोद अग्रहरीले चलचित्रको प्रोमसनमा नायिकाहरु नआउँदा आफु एक्लो परेको बताए,‘हामीले चलचित्रमा कलाकार भएर पारिश्रमिक लिएपछि त्यो फिल्मको प्रचार प्रसारमा सहभागी भएर फिल्मको व्यबसायमा साथ दिने हाम्रो दायित्व हो । उहाँहरु प्रोमोसनमा सहभागी हुनुभए मलाई पनि सजिलो हुन्थ्यो ।’

आशिष थापा मगर निर्माता र सन्तोष अधिकारी स्वयं कार्यकारी निर्माता रहेको फिल्ममा अजय अधिकारीको कथा, मनिष गौतमको पटकथा, राजनराज सिवाकोटीको संगीत, सम्राट बस्नेतको द्वन्द्व निर्देशन, महेश पौडेलको छायांकन, शैलेश श्रेष्ठको पार्श्व संगीत तथा बनिश शाह र सन्देश शाहको सम्पादन छ ।

(9 पटक भ्रमण गरिएको, आज 9 भ्रमणहरू)