काठमाडौं । गुडवील फाइनान्स लिमिटेडको स्थगित २९औं वार्षिक साधारण सभा माघ १५ गते गर्ने भएको छ ।
यसअघि पुस २९ गतेका लागि तय भएको वार्षिक साधारण सभा कम्पनीले विशेष कारणवश स्थगित गरेको थियो । पुस २२ गते बसेको कम्पनीको सञ्चालक समितिको बैठकले कम्पनीको कार्यालय, हात्तिसार, काठमाडौंमा बिहान ११ बजे सभा गर्ने निर्णय गरेको हो ।
सभाले गत आर्थिक वर्ष ०७९/८० को वार्षिक प्रतिवेदन सहितका वित्तीय विवरणहरू पारित गर्नुका साथै चालू आर्थिक वर्षको लागि लेखापरीक्षक नियुक्ति र निजको पारिश्रमिक निर्धारणको विषय टुङ्ग्याउनेछ । साथै एक जना महिलासहित संस्थापक शेयरधनीहरूको तर्फबाट दुई र सर्वसाधारण शेयरधनीतर्फबाट दुई जना गरी चार सञ्चालकको निर्वाचन गर्ने कार्यक्रम पनि सभाका लागि तय भएको छ ।
साधारण सभा प्रयोजनका लागि कम्पनीले पुस १८ देखि २९ गतेसम्म बुक क्लोज गरेको छ । बुक क्लोजको मिति कम्पनीले यसअघिको सूचनामा उल्लेख गरेबमोजिम नै कायम गरेको हो । बुक क्लोजको आधारमा पुस १७ गतेसम्म कायम शेयरधनीहरूले मात्र सभामा भाग लिन र लाभांश प्राप्त गर्न सक्नेछन् ।