एनसेलले खेल र खेलाडीको अभिवृद्धि एवं विकासका लागि विभिन्न खेलहरूमा आबद्धता जनाउँदै आएको जनाएको छ। कम्पनीले क्रिकेट, फुटबल, गल्फका साथै राष्ट्रिय तथा अन्तर्राष्ट्रिय खेलहरूमा नेपालको प्रतिनिधित्व गर्ने पारालम्पिक राष्ट्रिय खेलाडीहरूलाई पनि एनसेलले सहयोग गर्दै आएको बताएको छ।

यसैक्रममा एनसेल ‘त्रिदेशीय टी–२० आई सिरिज २०२४’ बाहेक हालै भएको आइसिसी लिग टु र नेपाल–क्यानडा एकदिवसीय सिरिजमा एनसेल ‘कनेक्टेड बाई’ साझेदारका रूपमा आबद्ध भएको थियो।

यसैगरी एनसेल ‘हाम्रो साथ नेपाली फुटबललाई’ भन्ने थिममा आधारित भई एनसेलले ‘वीरगन्ज गोल्ड कप’ र ‘झापा गोल्डकप’ लगायतका फुटबल खेलमा आबद्ध भएको थियो।

यस्तै ‘हामी तपाईंकै लागि’भन्ने थिममा आधारित भई एनसेलले राष्ट्रिय पारालम्पिक समिति (एनपीसी) नेपालसँगको सहकार्यमा नेपाल पारालम्पिक टोलीलाई साथ र सहयोग प्रदान गर्दै आएको छ।

चौथो एसियाली पारा खेलकुद २०२२ मा नेपाललाई इतिहासमै पहिलो पदक दिलाउन सफल पारा तेक्वान्दो खेलाडी पलेशा गोवर्धनलाई सम्मान गर्दै एनसेलले एक लाख रूपैयाँ नगद पुरस्कारलगायत विभिन्न खेल र खेलाडीलाई साथ दिँदै आएको जनाएको छ।

प्रकाशित: 24 फागुन 2080 10:03 बिहिबार